Masaplalang bayung banua! Masayang 2010 kekatamu ngan!

Panupaya po. Medyo malambat-lambat na naman bayu ku mekasulat kening kanakung Kapampangan blog. Ing tutu na pu nyan, kakadwa ketang ala ku talagang aisip isulat na masanting, medyo masyado ku pung marakal asikasuan kening mengalabasan a aldo.

Nung abasa yu ketang metung kung milabas a sinulat keni, mekapagobra na ku pu meg-umpisang Nobyembre ning milabasan banua. Anya pu talagang mebawas ing oras kung maka-online.

Neng bengi na mu pu, kaybat megobra, kanaku na ku mu milukluk harap ning computer ku para sumulat. Kadalasan, uling mapagal ku, e na ku makasulat man. Neng kayi, kabud na ku makatunganga keng monitor ning computer ku.

Makanyan pa man, pipilitan ku pa rin. Uling iya mu pu naman talaga ing kanakung peka-”outlet” ing pamanyulat. Keni ku mu apapasyag ing kanakung panamdaman. Balu yu naman pu siguro, aku nang dili. Deng anak na mu ilang kayabe ku.

Kapamu, pota nukarin ku pa miras. Ita mu pu ing kanakung buring sabyan, manyad dispensa, ampong mangako na potang makapag-adjust na ku king kanakung schedule, atuloy ku na pu ing regular a pamanyulat kareng blog ku, at kayabe ne pin pu ining kanakung Kapampangan blog.

Dakal pung salamat king oras.

Pasibayu pu, Masaplalang bayung banua kekatamu ngan!

Masaya ku ngeni uling nandin gatpanapun, mekatanggap kung aus king kanakung cellphone. Ibat ya ketang inaplayan ku anyang milabasan a domingo king Clark. Sinabi na kanaku a metanggap ku, at nung malyari kung mag-report bukas gatpanapun.

E ku mipabulad, nu’ne pepasalamat na ku mu.

King kelambatan na ning panaun, e ku isip-isipan a makapagobra ku pa. Ing tutu na nyan, medyo mitabangan na ku lub mamag-apply kareng kumpanya. Tambing dang akakit ing idad ku, at istung ikit da ita, pihadong e ku matanggap.

Metung pang sangkan, manibat anyang “minuli ya ligaya banua” ing kanakung asawa, milako na ku gana. Migkasya na ku king pabarya-baryang panakitan ku aldo-aldo king pamag-blog ku… ala na kung boss, mag-enjoy ku pa.

O’neng e na man kasi malyari ita. E ku pwedeng isipan mu kabud ing sarili ku. Atin kung atlung anak a kailangan kung pakanan, piblasan ampong papagaralan. E ku agawa ita nung ala kung masalese obra.

Anya pin dapat magpursigi para naman adinan ku lang masanting a kinabukasan, ara pin. E na ku man pwedeng kabud mu mamasa kareng saup ampong lunus da reng aliwa… nanu nang isipan da reng anak ku.

Ngeni atin na kung obra, malyari da na kung pagmaragul ding anak ku, maliban king adinan ku lang masanting a biye.

Pauli na niti, masaya ku para kareng anak ku.

Keng sumangid na nita, medyo malungkut ku rin.

Bisa ku’t ali, adyang makananu, mi-apektuan ya ing kanakung pamag-blog. Nung apansin yu la deng bilang da reng blog kung atyu king sidebar ku, malyaring awsan yu kung adik king pamag-blog.

E ku naman lilingad ita. Aku na pin, manibat anyang mebalu ku, ‘ya na mu ini ing erapan ku. Aldo’t bengi, susulat ampong susulat ampong susulat.

Maswelo ku istung apapasyag ku ing kanakung kapanamdaman – ke Kapampangan man, o Tagalog man, o English. Basta atin ku mu sanang asusulat.

Ngeni, mabawas ita nung ali man mituknan.

Malungkut ku, pero ala kung akarapat… kailangan… anya pin isipan ku na mu… masaya ku, uling atin na kung tutung obra.

E mu minsan ing mikutang kanaku, “nanung obra mu?” O kaya, patse mikit kami reng kaluguran kung malambat ku nang e akakit, kutang da, “nokarin ka magobra ngeni?”

Istung makanita na, e ku balu nung nanung pakibat ku.

Atin kung obra, pero aliwa itang kalupa na ning “ordinaryong obra” antimo kareng aliwa. Ing obra ku kasi mag-blog ku, o susulat ku keng blog, o blogger e.

Keni kasi kekatamu, pipilan la mu talaga ring mikibalu nung nanu ya ing blogger, o deta namang mikibalu, e da aintindian o e la maniwalang pwede yang maging obra ing pamaging-blogger.

Anya neng kayi, pakibat ku na mu, ala kung obra, kesa king mag-explain ku pang katakut-takot. Uling medyo masakit ya kasing i-esplika at e ke agyung simplian.

Mapalyari karetang miki-balu, e la maniwalang pwede yang manakitan ing metung a blogger o pwede ya talagang maging kapanintunan. Kareng aliwa naman siguro, makaramdam kayo a asno katalik manakitan king internet.

Ing tutu, pwede yang panakitan, pero e ya karagulan kalupa da reng amanuan da reng aliwa a makasali na kang bale ampong kotse.

Ngeni, keng malati kung panakitan medyo agyu ku neng alabas ing patingapun mi. Mu pin, detang aliwa pang kailangan, kalupa da ring matrikula da ring anak, kailangan ku pang manintun aliwang pikuanan pera. E pa kasi kanita karagul ing akakua ku.

Maigit na ku pung pabanuang mag-blog, at ngeni ku pa magumpisang manakitan. Opo, e pu kararagli, miki-investment mu naman pu keng oras ampong atin talagang ‘effort.’ Kailangan ing metung a blogger masipag yang susulat, at e mu basta susulat nune reng susulat na retang makabuluhan o retang buring akit deng mamasa.

Siguro po, ali ke pa a-explain masalese keni. Mapalyaring keng tutuking pamanyulat ku keni, malyari kung idake nung makananung manakitan king blogging.

Ngeni, ita pa mu ing buri kung sabyan… karetang mangutang nung nanu ing obra ku… metung ku pung blogger.