Pagkapilitan kung makasulat kawatasan Kapampangan bista man e makanita kalalam ing kanakung kebaluan king kekatamung Amanung Sisuan. Nga ku na pin sinabi ketang tatauli kung kawatasan a “Bingut ku pa mu naman,” e ku pa matalustus ampong dakal ku pa kanan a nasi.

Dapot, king kasimplian da ring kanakung obra, mikaswelo ku pung abalu a miyabe la kening kamalig na inaus dang Kawatasan Kapampangan a gewa na pu ning kekatamung kapatad a i Papa Osmubal.

Ini pung bilungan a ini, maglaman yang asna karakal a kawatasan manibat pa kang Diosdado Macapagal angga na kareng watas na ning kekatamung panaun… at nga ku na pin, miyabe ya naman ing “magsasa” a kalupa ku.

Deti pung kawatasan a atyu keting bilungan a iti, pipagalan na la pung kinalap ampong penyaliksik Papa Osmubal para mika-metung a imbakan a nung nukarin akit da la ngan deng miya-aliwang obra da reng Kapampangan a watas — matua ampong anak, bang e la masayang ampong sukat na lang lumbog nung alang magmasabal manyikap kareti.

Tutu ku pung maswelo anyang abalo kung inabe na lang Papa Osmubal deng kanakung obra. Pakiramdam ku tuloy, metung na ku naman watas anyang mi-abe ya ing lagyu ku kareng watas a atyu keti.

Ampong sigurado ku, maragul ya naman saup iti kareng anak a magaral uling abalu ku na makayabe ne ing Kapampangan king karelang panigaralan anya potang kayi, kabud na la manintun kawatasan Kapampangan.

Ngeni, agkatan da kayu ngan pu, matua’t anak kening bilungan a gewa nang Papa Osmubal a nung nukarin makatipun la ngan deng kawatasan a Kapampangan.

Ampo nung atin kayu pang balung kawatasan at e yu la ikit karin, sabyan yu la pu kaya at malugud na la pung iyabe. Uling iya pu ing kayang parasan, ing akalap no ngan deng egana-ganan kawatasan ketang kayang kamalig.

Dakal pung salamat Kang Papa Osmubal keting gewa mu ini. Maragul yang bage para keng pamaglabung na pang lalu ning literaturang Kapampangan.

Luid ka Papa Osmubal!

Luid ya ing Amanung Sisuan!

Kapilan mu ku paniwalan? E na ku man malaram
Gisan ku na ing nasi, meragul na ku atyan
Pati aslam yu, inaldok ku na ngan
Gewa ku na ing buri mu, e mu ku pa rin papansinan

Mayapa ing maestra tang English, keka yang paniwalaan
Adyang deng subject ampong predicate na, bali-baligtad no man
Pati maestro nang Science na e mu naman aintindiyan
Awsan neng gas ing krudo, saka na sabyan liquid ya naman

Ume da ka sanang atad, o kakung palsintan
Kapapakibat mu kaku balu mu ne man ing dalan
Mi-uli kang dili mu, e ra ka pigaganakan
Sinta ko, o’t lagi mu kung panyoplan?

Minsan lalapit ku pa, gilutan mu na ku
Saka ka milayi, anting menakit a multo
Ibie ku la sana, seli kung bulaklak para keka
Kabage da pa mo sana deting mabanglong Sampaguita

Angga pa kapilan mu ku kaya pasakitan?
At subukan me ing lugud kung alang kapupusan
Makanyan pa man, e mu ku pa rin apatuknan
Bukas a bukas mu rin, ding kekong abyas isundu kong bilangan

—————————————
Roy
June 24, 2008
11:05 AM
Angeles City
Philippines

Bakit mo pin kaya istung ating kepalyaran, keng okasyon na mismu ning burol, metung pisasabyan ing pamaki’sawa na ning melakwan? Makanita wari ing dapat? Imbes na damayan yang tapat ing kematen, malaus ‘ta yang tatasan. Balamu mo wari tatalnan taya kaisipan. Asna ka tamu kayapan!

At e aliwa in milyari kanaku, king aldo ning burul ning asawa ku. Bista man alang sasabing diretso, atin kang daramdaman. Bakit kaya makanyan ing ugaling Filipino?

Anya pin anyang isipan ku itang milyari kanita, mekagawa kung poesia patungkol king ugaling ita, ampong sarili kung eksperiyensa. Wapin pu ini…

“Maki’sawa ya pa kanyan!”

“Maki’sawa ya pa kanyan!” nga’rang misisitsitan
E mu ning mapilan nune kerakalan
Dipane! Kanyaman dang panyapingilan!
Kasalukuyan kang manangis, o’t nanu ing karelang isipan!

Atin pa pin mengahas ing kanaku mengamanu
“Maki’sawa ka ‘tong, anak ka pa rugu,
panabilin ku mu at pakasiguraduan mu
e nala panasakitan deting kanakung apu”

Pasalamat ya’t makatwa ya ining kanaku sinabi
Nung ali baka siguro aparaya ke labi
Ustu wari ing sabyan na kanaku ita?
Burol ning asawa ku… kayap a matwa!

E ku magsalitang patapos, at eku naman santo
Balu kung e malagwa ing bie na ning soltero
Atlung anak, ing kanaku melakwan at sukat lingapan
Ing pamaglandi ‘ya pa naman wari ing kanakung intindian?

Bakit pin kaya makanyan ing utak tamung tao?
Lalo’t anak-anak ya ing melakwan a mebalu
Agad-agad kekatamu yang tatasan
“Maki’sawa ya pa yan” – asnang kasiguraduan

——————————————–
Roy
July 27, 2008
1:26 PM
Angeles City

Kabang ala ku pa pung asusulat keni, pabusten yu pung idake ke pasibayu ing kanakung mumunang tula, o poesiang Kapampangan a kanakung asulat.

Ing kanakung pangamulat:

Kalambat Ku Palang Mulala!

Kalambat ku palang mulala, antimong tupang mawawala
Pilit keng kakaulan, ing dila da reng banyaga
Kanta, tula ampong sanese, keng english ko tatalete
Na ku pa mo kapagmaragul, ing batal ku e me abakle

Minsan a aldo, anti ku mong mitakid… misubub
Bala mo migising king malambat a pangatudtud
Kantang Kapampangan, kakung apakiramdaman
Poesia ampong sanese, mekapamasa ku naman

Kasanting da palang babasan, kanyaman dang pakiramdaman
Anti mong pamangan a tiktak yumu, pero e makasabal man
Ing Amanung Sisuan, tutu yang makagiyam
Mengari ka mong bingut, yuyuyu ra king duyan

Anya pin inisip kung subukan, ta’t mo ali?
Kapampangan ku pa rin, yan ing mumunang dili!
Ing Amanung Sisuan, kanaku yang gamitan,
Kareng kakung susulat, ipasyag k’ya naman

Dapot minisip ku’t mikakunu naman
Pota mipakarine ku, maging pikatulan
Lunto kung magsasa, trying hard ing datang
Uling ing Kapampangan ku, medyo mababo la naman

Mikakunu ku man, masikan na ku pa rin agutan
Mengari mong ket lamok, ne nyaman gamusan
Ipasyag ku ing kanaku, adyang mababo Kapampangan
Siguro keng kelambatan, mabyasa ku naman

Ngeni e na ku mulala, e na ku malilili
Keng sariling bale, antimong mekauli
Ing sarili kung salita, kanaku neng gagamitan
Yapin ing Kapampangan, ing Amanu kung sisuan

——————————
Roy
June 24, 2008
9:00 AM
Angeles City
Philippines