Masaplalang bayung banua! Masayang 2010 kekatamu ngan!

Panupaya po. Medyo malambat-lambat na naman bayu ku mekasulat kening kanakung Kapampangan blog. Ing tutu na pu nyan, kakadwa ketang ala ku talagang aisip isulat na masanting, medyo masyado ku pung marakal asikasuan kening mengalabasan a aldo.

Nung abasa yu ketang metung kung milabas a sinulat keni, mekapagobra na ku pu meg-umpisang Nobyembre ning milabasan banua. Anya pu talagang mebawas ing oras kung maka-online.

Neng bengi na mu pu, kaybat megobra, kanaku na ku mu milukluk harap ning computer ku para sumulat. Kadalasan, uling mapagal ku, e na ku makasulat man. Neng kayi, kabud na ku makatunganga keng monitor ning computer ku.

Makanyan pa man, pipilitan ku pa rin. Uling iya mu pu naman talaga ing kanakung peka-”outlet” ing pamanyulat. Keni ku mu apapasyag ing kanakung panamdaman. Balu yu naman pu siguro, aku nang dili. Deng anak na mu ilang kayabe ku.

Kapamu, pota nukarin ku pa miras. Ita mu pu ing kanakung buring sabyan, manyad dispensa, ampong mangako na potang makapag-adjust na ku king kanakung schedule, atuloy ku na pu ing regular a pamanyulat kareng blog ku, at kayabe ne pin pu ining kanakung Kapampangan blog.

Dakal pung salamat king oras.

Pasibayu pu, Masaplalang bayung banua kekatamu ngan!

Masaya ku ngeni uling nandin gatpanapun, mekatanggap kung aus king kanakung cellphone. Ibat ya ketang inaplayan ku anyang milabasan a domingo king Clark. Sinabi na kanaku a metanggap ku, at nung malyari kung mag-report bukas gatpanapun.

E ku mipabulad, nu’ne pepasalamat na ku mu.

King kelambatan na ning panaun, e ku isip-isipan a makapagobra ku pa. Ing tutu na nyan, medyo mitabangan na ku lub mamag-apply kareng kumpanya. Tambing dang akakit ing idad ku, at istung ikit da ita, pihadong e ku matanggap.

Metung pang sangkan, manibat anyang “minuli ya ligaya banua” ing kanakung asawa, milako na ku gana. Migkasya na ku king pabarya-baryang panakitan ku aldo-aldo king pamag-blog ku… ala na kung boss, mag-enjoy ku pa.

O’neng e na man kasi malyari ita. E ku pwedeng isipan mu kabud ing sarili ku. Atin kung atlung anak a kailangan kung pakanan, piblasan ampong papagaralan. E ku agawa ita nung ala kung masalese obra.

Anya pin dapat magpursigi para naman adinan ku lang masanting a kinabukasan, ara pin. E na ku man pwedeng kabud mu mamasa kareng saup ampong lunus da reng aliwa… nanu nang isipan da reng anak ku.

Ngeni atin na kung obra, malyari da na kung pagmaragul ding anak ku, maliban king adinan ku lang masanting a biye.

Pauli na niti, masaya ku para kareng anak ku.

Keng sumangid na nita, medyo malungkut ku rin.

Bisa ku’t ali, adyang makananu, mi-apektuan ya ing kanakung pamag-blog. Nung apansin yu la deng bilang da reng blog kung atyu king sidebar ku, malyaring awsan yu kung adik king pamag-blog.

E ku naman lilingad ita. Aku na pin, manibat anyang mebalu ku, ‘ya na mu ini ing erapan ku. Aldo’t bengi, susulat ampong susulat ampong susulat.

Maswelo ku istung apapasyag ku ing kanakung kapanamdaman – ke Kapampangan man, o Tagalog man, o English. Basta atin ku mu sanang asusulat.

Ngeni, mabawas ita nung ali man mituknan.

Malungkut ku, pero ala kung akarapat… kailangan… anya pin isipan ku na mu… masaya ku, uling atin na kung tutung obra.

Kapilan mu ku paniwalan? E na ku man malaram
Gisan ku na ing nasi, meragul na ku atyan
Pati aslam yu, inaldok ku na ngan
Gewa ku na ing buri mu, e mu ku pa rin papansinan

Mayapa ing maestra tang English, keka yang paniwalaan
Adyang deng subject ampong predicate na, bali-baligtad no man
Pati maestro nang Science na e mu naman aintindiyan
Awsan neng gas ing krudo, saka na sabyan liquid ya naman

Ume da ka sanang atad, o kakung palsintan
Kapapakibat mu kaku balu mu ne man ing dalan
Mi-uli kang dili mu, e ra ka pigaganakan
Sinta ko, o’t lagi mu kung panyoplan?

Minsan lalapit ku pa, gilutan mu na ku
Saka ka milayi, anting menakit a multo
Ibie ku la sana, seli kung bulaklak para keka
Kabage da pa mo sana deting mabanglong Sampaguita

Angga pa kapilan mu ku kaya pasakitan?
At subukan me ing lugud kung alang kapupusan
Makanyan pa man, e mu ku pa rin apatuknan
Bukas a bukas mu rin, ding kekong abyas isundu kong bilangan

—————————————
Roy
June 24, 2008
11:05 AM
Angeles City
Philippines

Kabang ala ku pa pung asusulat keni, pabusten yu pung idake ke pasibayu ing kanakung mumunang tula, o poesiang Kapampangan a kanakung asulat.

Ing kanakung pangamulat:

Kalambat Ku Palang Mulala!

Kalambat ku palang mulala, antimong tupang mawawala
Pilit keng kakaulan, ing dila da reng banyaga
Kanta, tula ampong sanese, keng english ko tatalete
Na ku pa mo kapagmaragul, ing batal ku e me abakle

Minsan a aldo, anti ku mong mitakid… misubub
Bala mo migising king malambat a pangatudtud
Kantang Kapampangan, kakung apakiramdaman
Poesia ampong sanese, mekapamasa ku naman

Kasanting da palang babasan, kanyaman dang pakiramdaman
Anti mong pamangan a tiktak yumu, pero e makasabal man
Ing Amanung Sisuan, tutu yang makagiyam
Mengari ka mong bingut, yuyuyu ra king duyan

Anya pin inisip kung subukan, ta’t mo ali?
Kapampangan ku pa rin, yan ing mumunang dili!
Ing Amanung Sisuan, kanaku yang gamitan,
Kareng kakung susulat, ipasyag k’ya naman

Dapot minisip ku’t mikakunu naman
Pota mipakarine ku, maging pikatulan
Lunto kung magsasa, trying hard ing datang
Uling ing Kapampangan ku, medyo mababo la naman

Mikakunu ku man, masikan na ku pa rin agutan
Mengari mong ket lamok, ne nyaman gamusan
Ipasyag ku ing kanaku, adyang mababo Kapampangan
Siguro keng kelambatan, mabyasa ku naman

Ngeni e na ku mulala, e na ku malilili
Keng sariling bale, antimong mekauli
Ing sarili kung salita, kanaku neng gagamitan
Yapin ing Kapampangan, ing Amanu kung sisuan

——————————
Roy
June 24, 2008
9:00 AM
Angeles City
Philippines