Balloon Fiesta, yan ing aus mi ding anak ku keng Hot Air Balloon Festival. Patse atyu ne ing Enero pirming antabayan mi ya ing kaganapan a ini. At ngeni ping banwang ini, maganap ya iti king bulan ning Pebrero.

Matula kami ding anak ku patye akakit mi lang balamu gagato la mu king babo kayabe da reng ulap. Asno kasanting lalawen lalu na miyayaliwa la hugis ampong kule.

Aganaka ku pa anyang makatuknan kami pa Bagongbayan king Cutcut, migigising kami uling lalabas la mismo keng tulid mi. Asne kasigla itang karelang makinaryang magpalual api para mihanginan ya itang maragul a lobo. Asno mu kababa, anya pin na ke kasayang mipapamilya adyang pang meistorbo kami tudtud.

Ngeni, babalakan kung minta king Clark king a-onse ning Pebrero hanggang katorse nung kapilan ya maganap ing ka-labinlimang Hot Air Balloon Festival.

Kanyaman sigurong sasake kareng lobong areta, oneng tabalu mu nung e ku mitakutan. Pota malilyu ku mu.

Ninu pung munta? Mi’kit-ikit tamu karin.

Masaya ku ngeni uling nandin gatpanapun, mekatanggap kung aus king kanakung cellphone. Ibat ya ketang inaplayan ku anyang milabasan a domingo king Clark. Sinabi na kanaku a metanggap ku, at nung malyari kung mag-report bukas gatpanapun.

E ku mipabulad, nu’ne pepasalamat na ku mu.

King kelambatan na ning panaun, e ku isip-isipan a makapagobra ku pa. Ing tutu na nyan, medyo mitabangan na ku lub mamag-apply kareng kumpanya. Tambing dang akakit ing idad ku, at istung ikit da ita, pihadong e ku matanggap.

Metung pang sangkan, manibat anyang “minuli ya ligaya banua” ing kanakung asawa, milako na ku gana. Migkasya na ku king pabarya-baryang panakitan ku aldo-aldo king pamag-blog ku… ala na kung boss, mag-enjoy ku pa.

O’neng e na man kasi malyari ita. E ku pwedeng isipan mu kabud ing sarili ku. Atin kung atlung anak a kailangan kung pakanan, piblasan ampong papagaralan. E ku agawa ita nung ala kung masalese obra.

Anya pin dapat magpursigi para naman adinan ku lang masanting a kinabukasan, ara pin. E na ku man pwedeng kabud mu mamasa kareng saup ampong lunus da reng aliwa… nanu nang isipan da reng anak ku.

Ngeni atin na kung obra, malyari da na kung pagmaragul ding anak ku, maliban king adinan ku lang masanting a biye.

Pauli na niti, masaya ku para kareng anak ku.

Keng sumangid na nita, medyo malungkut ku rin.

Bisa ku’t ali, adyang makananu, mi-apektuan ya ing kanakung pamag-blog. Nung apansin yu la deng bilang da reng blog kung atyu king sidebar ku, malyaring awsan yu kung adik king pamag-blog.

E ku naman lilingad ita. Aku na pin, manibat anyang mebalu ku, ‘ya na mu ini ing erapan ku. Aldo’t bengi, susulat ampong susulat ampong susulat.

Maswelo ku istung apapasyag ku ing kanakung kapanamdaman – ke Kapampangan man, o Tagalog man, o English. Basta atin ku mu sanang asusulat.

Ngeni, mabawas ita nung ali man mituknan.

Malungkut ku, pero ala kung akarapat… kailangan… anya pin isipan ku na mu… masaya ku, uling atin na kung tutung obra.