Para kareng e pa mekapamasa, pepekat ku la pasibayu keni, ibat ketang luma kung Kapampangan blog, deting miyayaliwang birung akalap nung nukarin, bang mipakayli la adyang bagya mu.

Para naman kareng mekapamasa na, basan tala pasibayu, at pihong mipakayli tamu ulit.

Tinipun a kalokoan, Kepampanganan!

Miyayaliwang biru o kalokoan a akalap ku kareng palele-lele, at saka ko Kepampangan… makatula la pa rin kaya?

Lawen tala.

E maluglug
Lalaki: “O joe, malyari mo potang mamipi ka, pakaluglugan mu ing imalan!”
Babai: (mimwa ya) “Aba! Sikan mu lub magsalita! Pakaluglugan ku yan a! Nung makatatlo mu luluglugan ku yan!”
Lalaki: “Ika naman joe, paglaraman mu ku pa”
Babai: “O’t sinabi mu naman maglaram ku?!”
Lalaki: “Makanano napun pauli ku, mirasnan ku uran keng dalan… binula ya ing imalan ku anyang mebasa ku king uran!”

Ing Penibatan
Lito: “Ima, nukarin la pu menibatan deng tau?”
Ima: “Menibatan tamu anak kang Eba ampong Adan, Ila reng minunang lelengan ning Apung Guinu. Ila reng pipulpulan tamu”
Lito: “Bakit sabi ng Tatang ku, menibatan tamu kanu kareng matsing?”
Ima: “Balu mu ‘tong, ustu ya rin naman i Tatang mu e…”
Lito: (gagamus ya buntuk) “Makananu ya pung ustu, aliwa ya ing sinabi yu? Ikayu ing mali?”
Ima: “Ay! ali ‘tong, ustu ya itang kanaku, ustu ya naman i Tatang mu… kasi itang pekibat na keka, karen yang partido na ita”

E Tatakut
BRUNO: Nanu ya ing papel a yan?
PEDRO: Listahan da reng taong tatakut kanaku
BRUNO: Dipane! O’t atyu ya ing lagyu ku keni?!
PEDRO: ‘Ta bakit? Eka wari tatakut kanaku?!
BRUNO: Ali ku! Bakit?!
PEDRO: O e di, buran ke! Ala namang kasu kanaku ita!

Deng bayung kasal
MRS: Darling… malapit ta ‘nang maging atlu kening bale
MR: Tuto darling?! Apasaya mu ku keng balita mu ‘yan!
MRS: Wa darling…. keni ne tuknan i ‘ma ku

Ing asawa
Manyaman yang matutud ing babai ampong maninap… anyang bigla yang ginulisak: “Ligwa mu, awyan na ing mister ko!”
Tinalakad ya ing kasiping nang lalaki at saka linundag king awang… at saka na aganaka: “Alte! Akung mister na e!”

Ing Anak a makulit
Anak: Salwana pung ubas!
Tindera: Ala kaming ubas
TUTUKING ALDO…..
Anak: Salwana pung ubas!
Tindera: Ala kaming ubas
TUTUKING ALDO PASIBAYU…..
Anak: Salwana pung ubas!
Tindera: Sabi nang alang ubas e! Patse mengutang ka pa, istepler ku ne ing balungus mu!
TUTUKING ALDO NA NAMAN PASIBAYU…..
Anak: Atin kayu pu stapler?
Tindera: Ala…
Anak: Salwana pung ubas!

Sana pu mipakayli kayu, adyang makananu mu

Pilan nang aldo, mag-umpisa na rin ing kampanya kareng kakandidatong opisyales ning balen. Sigurado mu, masigla masaya na naman kanta.

E ta na alako, ala namang kaso kanaku nung masigla masaya, makanyan talaga mangampanya la e.

Pero makanita man, atin ku po sanang pakisabing mayap kareng kekatamung kandidato… nung malyari mu po sana… ne?

Ing pakisabi ku po, simple ya mu po.

Nung malyari mu po sana, e ta sana basta-basta mamakat sticker o nanu pa mang papel kareng bakod ampong gate da reng miki-bale… lalung-lalo na nung alang paintulot… ampong lalung-lalo na nung aliwa naman pala ikayo ing buri dang suportan.

E yu po siguro balu, dakal ing mibibili king alanganin pauli na ning kabud na mu atin makapakat a litrato na ning metung a kandidato king gate na ning metung a memalen. Intindiyan ta mu po sana ita.

Ampong e na kalupa ning sigla, a nung nukarin kalabas yu, ala nang masigla. Deni pung pakapakat a reni, neng angga nang tutuki pang eleksyon atyu la pa. Ni e yu la man aganakang palinis.

Balu ku, atin pung makatulid o makatalagang lugar a nung nukarin pwedeng mamakat stickers ampong posters. Karen pung residential, palage ku po, atyu na kareng mikibale ita.

Pakisabi mu pong mayap, uling balu ku aliwa naman ikayo ing mamakat karen, turuanan ta la po sana reng tao tamu a manyad permiso kareng mikibale bayu la mamakat kareng gate da ampong pader.

Pakisabi mu pong mayap.

Dakal pung salamat!

Kwentuhan tamu pa.

Ating metung dyip a mamasada, ing ruta na C-point–Holy–Hi-way, detang kule blue. E ne man masyado malati, e ne man masyado maragul… anaman ya ing bangko misusumangid.

Ing dyip a ini, magbiyahe ne papunta na king SM Clark, buring sabyan, dinurut ne palengke ning Angeles, pisamban maragul, Holy, Sto. Entierro, ampong AUF.

Medyo, miswert’yan ya king biyahe ing kaluguran ta’ng driver. Karas na pa kasi king main gate in Marisol, sapak ne. Mipa-intagun, SM la ngan kuldas pare-pareho ding pasaheros na… anya pin diretso ne mu ing byahe.

Bista man sapak ya, tahimik king kilub ning dyip uling e no man mikikilala ding pasaheros.

Atin metung a babaing malagu a medyo sosyal a maka-min skirt, busy ya mo kanung mag-text, atin naman metung a balamu atin yang sariling yatu uling atin makasaksak earphone king balugbug na. Atin pang aliwang maka-uniform saleslady ning SM at ding aliwa naman, mamasyal la siguro.

Diretso yang mag-biyahe ing dyip – alang alingasngas, alang traffic, alang aberya. Masanting ing aldo.

Anyang kumorba ne ing dyip ketang 1st St., papunta ne SM, biglang ating siningo e masanting a bau. Balu yu na siguro ing buri kung sabyan… atin minatut (panupaya pu).

Alang bubulad, kabud la magtakap arung ding pasahero… medyo mipaglalawe lang pasimple. Ala la man kasi dimdam e. Oneng balu ta’ naman ing atot, nung sanu ing tahimik, ya ing mabagsik.

Natural mu, alang mamamin kareng pasahero. Ing drayber, silip-silip ya ketang salamin na… titimplan no siguro ding pasahero na.

Maligwang salita, miras ya terminal ning SM ining dyip a ala pa rin bubulad.

Ume na lang kuldas dening pasahero uling miras na la pin terminal, anyang bigla yang minirit ing drayber…

“Saguli mu pu, ita pung minatut… ali ya pa po memayad.”

Kabira-bira, mekibat ya itang babaing malagung maka-mini… “Oy! Excuse me, memayad na ku!”

Metung ka ba kareng Holy Angel alumni?

Mekapag-attend na ka kareng homecoming a magaganap balang Disyembre na ning banwa?

Nung alumni na ka ning Holy Angel, ke makapag-attend na kang homecoming o ali pa, buri ku mung pabalu ing blog a nung nukarin makapamasa kang balita tungkol king preparasyon para king homecoming king banwang ini.

Wapin pu yan ing HAU Grand Alumni Homecoming a kanakung gewa bilang miyembro na ning Primemovers Batch 85 a maging host na ning homecoming ngeni.

Deng kasalukuyan makapaskel – Bakit importante in homecoming? Makananu kung makasaup? Ampo deng tutuking batch meeting.

Mapalyari pung asabi yu na para ya mu king batch mi blog a ini, ali ya po. Para ya po kareng buong alumni na ning Holy Angel University ing blog.

Uling ikami po ing host ngeni, makanyan madalas yang mababanggit ing batch, pero deng impormasyon, para ya kareng egana-ganang graduate na ning Holy Angel.

Kalupa na pu ning sinabi ku, makabasa kayong updates tungkol king homecoming, miya-yaliwang articles tungkol king homecoming, ampong samu’t-saring kwento tungkol king kekatamung alma mater.

Agkatan da kayo pung mamasyal ketang blog tamung ita – ing blog para kareng alumni ning Holy Angel. Mas masanting nung makapagsubscribe kayo para tambing kayong ma-update patse atin bayung misulat karin.

Mikit-ikit tamu po king alumni blog… at para mas masaya, mikit-ikit tamu king homecoming king daratang a Disyembre.

Dakal pung salamat!

Balloon Fiesta, yan ing aus mi ding anak ku keng Hot Air Balloon Festival. Patse atyu ne ing Enero pirming antabayan mi ya ing kaganapan a ini. At ngeni ping banwang ini, maganap ya iti king bulan ning Pebrero.

Matula kami ding anak ku patye akakit mi lang balamu gagato la mu king babo kayabe da reng ulap. Asno kasanting lalawen lalu na miyayaliwa la hugis ampong kule.

Aganaka ku pa anyang makatuknan kami pa Bagongbayan king Cutcut, migigising kami uling lalabas la mismo keng tulid mi. Asne kasigla itang karelang makinaryang magpalual api para mihanginan ya itang maragul a lobo. Asno mu kababa, anya pin na ke kasayang mipapamilya adyang pang meistorbo kami tudtud.

Ngeni, babalakan kung minta king Clark king a-onse ning Pebrero hanggang katorse nung kapilan ya maganap ing ka-labinlimang Hot Air Balloon Festival.

Kanyaman sigurong sasake kareng lobong areta, oneng tabalu mu nung e ku mitakutan. Pota malilyu ku mu.

Ninu pung munta? Mi’kit-ikit tamu karin.

Kabang ala ku pang balung isulat kening kanakung Kapampangan Blog, pabusten yu pung ituloy ke pa ing pamag-lipat ku karetang aliwa pang makapaskil ketang luma kung blog a Kapampangan.

Aku na pin ketang minuna, ditak-ditak ilipat ku la detang aliwa nang laman nita uling ali ku ne i-update ita pauli ning ini na mu ing kanakung imentenang blog king Amanung Sisuan.

Ini pung sinulat kung ini, tungkul ya kareng obserbasyon ku kareng ali-aliwang ugali da pu ring pasaherong Filipino. Nung sakali man pu, atin mituran, panupaya pu, obserbasyon ampong sarili mu pung opinyon ini.

Ding miyayaliwa dang dapat ding pasaherong Filipino:

Deng mahilig keng harap
Kerakalan deng lalake reni, oneng atin mu naman babaying makanini. Ala naman marok kanini, uling mas komportable ampong e ka mangadamusak a bitis kareng sasake ampong kukuldas. Asabi ku naman, metung ku naman karetang mahilig lulukluk king harap.

Apansinan ku mu neng minsan, patse makasake ku harap. Ating makisiping, adyang ala ya man laman king gulut! Ing amanuan ku itang ala talagang pasahero ne, ali ku sasabyan maliwalas. Makisiping la pa rin keng harap, adyang makanita man. Deta retang talagang masyadong mahilig keng harap.

Deng kapit-tuko king gulut
Kabaligtaran da reng mahilig keng harap, deni retang ketang sulok keng gulut. Nung apansin mu patse sake na ka, panyiksik de ing buldit da ketang suluk, balamu mo wari kukunan me itang lugar na.

Ala mu naman marok kanini. Pakisabi ku mu sanang mayap kareng taong a reni, potang ating sasake, pakilisya da la reng bitis ampong tud da. Ampong paki-abutan da na la rin sana deng gamit dang mabayat reng sasake, lalu na reng matwa.

“Malapit ku mu po”
Neng kayi medyu malulukami ku kareni, nung makalukluk ka ketang gulut, padusugan da ka ba lang milukluk. Kapate do reng kapit-tuku reni uling buri da pin ilang atyu keng dulu.

Nung matwa o masakit ya, apanupaya me pa. Pero nung masikan ne man, maybug meng gulisakan “malapit ka pala, o’t e na ka maglakad?!” Neng kayi kasi, adyang maliwalas keng kilub, palakwan da ka e. Mamili lang bangko da!

Deng manenayang ipus
Deni ring sablang kasaman ku! Kalupa da la naman deng kakadwa reni, kapit-tuko la naman keng gulut. Akit mu la reni potang sake ka king dyip, atyu la ketang dulo ning dyip. Ala yang aliwang sake ing dyip nune ‘ya kabud, asne kasandal ketang suluk, ne kakampante.

Kasake mu, neng kayi e pa man tatagkil ing buldit mu keng bangko, damdaman me “ayni pung bayad ko! pwede pung paki-abot?” Maybug kang misdan! Ala naman marok keng maki-abot, oneng maybug kung kutang karela, “buring mung sabyan, nung e ku sinake e ka mamayad?!”

Ali la siguro, ala lang ipus e. Anya pin panenayan de pang sake ing ipus da.

Deng mag-maklak-maklakan
“bayad po! pwede pong paki-abot?” “paki-abot na po ing bayad,” “ayni pu ing bayad ko” kulang na mo gulisak na ka, e na ka pa rin pansinan. Halos iharap mu na king lupa na ing bayad mu, ala pa ring kwenta!

E ko pa mekatupang makanini? Maswelo kayo! Menakit na ku, e mu minsan. Apansin ku, sasaryan da! E la talagang bisang manabot bayad! E la bisang maging ipus. Asno kanyanman sagapan ne! Atin ku kakilalang mismong makanyan.

Bala ku, maliban kareng mebanggit, atin pang aliwa. Aku pin anyang muna keng isulat ini, atin ya pang kakadwang dake. Sana ayari ku ne kanyan, ba keng atuki keni.

Deni pu ilang kanakung obserbasyon. Pasibayu pu, kanaku mu pu. Nung atin menasakit, e pu sasaryan.

Dakal pung salamat.

Masaplalang bayung banua! Masayang 2010 kekatamu ngan!

Panupaya po. Medyo malambat-lambat na naman bayu ku mekasulat kening kanakung Kapampangan blog. Ing tutu na pu nyan, kakadwa ketang ala ku talagang aisip isulat na masanting, medyo masyado ku pung marakal asikasuan kening mengalabasan a aldo.

Nung abasa yu ketang metung kung milabas a sinulat keni, mekapagobra na ku pu meg-umpisang Nobyembre ning milabasan banua. Anya pu talagang mebawas ing oras kung maka-online.

Neng bengi na mu pu, kaybat megobra, kanaku na ku mu milukluk harap ning computer ku para sumulat. Kadalasan, uling mapagal ku, e na ku makasulat man. Neng kayi, kabud na ku makatunganga keng monitor ning computer ku.

Makanyan pa man, pipilitan ku pa rin. Uling iya mu pu naman talaga ing kanakung peka-”outlet” ing pamanyulat. Keni ku mu apapasyag ing kanakung panamdaman. Balu yu naman pu siguro, aku nang dili. Deng anak na mu ilang kayabe ku.

Kapamu, pota nukarin ku pa miras. Ita mu pu ing kanakung buring sabyan, manyad dispensa, ampong mangako na potang makapag-adjust na ku king kanakung schedule, atuloy ku na pu ing regular a pamanyulat kareng blog ku, at kayabe ne pin pu ining kanakung Kapampangan blog.

Dakal pung salamat king oras.

Pasibayu pu, Masaplalang bayung banua kekatamu ngan!

Masaya ku ngeni uling nandin gatpanapun, mekatanggap kung aus king kanakung cellphone. Ibat ya ketang inaplayan ku anyang milabasan a domingo king Clark. Sinabi na kanaku a metanggap ku, at nung malyari kung mag-report bukas gatpanapun.

E ku mipabulad, nu’ne pepasalamat na ku mu.

King kelambatan na ning panaun, e ku isip-isipan a makapagobra ku pa. Ing tutu na nyan, medyo mitabangan na ku lub mamag-apply kareng kumpanya. Tambing dang akakit ing idad ku, at istung ikit da ita, pihadong e ku matanggap.

Metung pang sangkan, manibat anyang “minuli ya ligaya banua” ing kanakung asawa, milako na ku gana. Migkasya na ku king pabarya-baryang panakitan ku aldo-aldo king pamag-blog ku… ala na kung boss, mag-enjoy ku pa.

O’neng e na man kasi malyari ita. E ku pwedeng isipan mu kabud ing sarili ku. Atin kung atlung anak a kailangan kung pakanan, piblasan ampong papagaralan. E ku agawa ita nung ala kung masalese obra.

Anya pin dapat magpursigi para naman adinan ku lang masanting a kinabukasan, ara pin. E na ku man pwedeng kabud mu mamasa kareng saup ampong lunus da reng aliwa… nanu nang isipan da reng anak ku.

Ngeni atin na kung obra, malyari da na kung pagmaragul ding anak ku, maliban king adinan ku lang masanting a biye.

Pauli na niti, masaya ku para kareng anak ku.

Keng sumangid na nita, medyo malungkut ku rin.

Bisa ku’t ali, adyang makananu, mi-apektuan ya ing kanakung pamag-blog. Nung apansin yu la deng bilang da reng blog kung atyu king sidebar ku, malyaring awsan yu kung adik king pamag-blog.

E ku naman lilingad ita. Aku na pin, manibat anyang mebalu ku, ‘ya na mu ini ing erapan ku. Aldo’t bengi, susulat ampong susulat ampong susulat.

Maswelo ku istung apapasyag ku ing kanakung kapanamdaman – ke Kapampangan man, o Tagalog man, o English. Basta atin ku mu sanang asusulat.

Ngeni, mabawas ita nung ali man mituknan.

Malungkut ku, pero ala kung akarapat… kailangan… anya pin isipan ku na mu… masaya ku, uling atin na kung tutung obra.

Kiniyak na ku na naman
E ku balu nanung sangkan
Kabud na pinatak ing kakung lua
At e ku na apigilan

Kiniyak na ku na naman
O’t kabud na ku mengaga?
Tutu, agaganaka ke ing kanakung asawa
Pero sigurado kung ali ita ing sangkan

Kiniyak na ku na naman
O bakit kaya makanyan?
Malulukami na ku king sarili ku
Nanung migpa-lua kanaku?

Kiniyak na ku na naman
At saka ku biglang mipatiman
Aganaka ku na nung nanu ing sangkan
Mangili kung sibuyas, uling magluto kung apunan

——————————————
Roy
November 13, 2009
9:09 PM
Angeles City
Philippines

*Kapampangan translation ning kanakung tulang I cried again…

(Menibat ya pu ini ketang luma kung blog a Kapampangan, papaskil ke mu naman pu keni uling lilipat ku la ditak-ditak detang pwedeng ilipat menibat keta)

Kanita, atin ku akayabe keng obra a makwento. Asne karakal a balung biru o joke ara pin. Andat makalupung na kami, kakabid yang kakabid pauli na pin deng makatula nang kwento. Metung ya ini kareng paborito kung kwento na…

Misan a aldo kanu, atin metung a bayung-tao a miparas bandang Sapangbato. Kanita ya pa mekapunta ing lalaking ayni at ala yang kebalu-balu tungkol keng lugar.

Miras ya karin uli mong akutang na nung nukarin sasake papuntang Sapangbato. Ikwa na pin miras at kinuldas ne king dyip, ngeni atin na ne na naman problema. E ne balung puntalan ing pake nang lugar.

Ala ya rugung akit a apikutnangan na ing tao.

Angga king atagmuan ing metung kareng kapatad tang baluga (panupaya yu pu, makanyan ya pu kasi ing kwento e). Ala ya rugung akarapat at kaniti ya mengutang, sinabi ne ing lagyu ning lugar ampong taong kailangan nang puntalan.

Mityempo naman, balu ne ning ‘kulot‘ ing pantunan na! (e ku ne pa mu pu gamitan itang ‘b’ ne?) “Wa, koya balu ke yan! Bisa ka, saupan da ka pa!”

Karagul na pasalamat ning bayung-tao, adyang makananu mikamasala keng lakad na. Kitnangan ne ing kulot, “Malaut ya ba ini? Nanung saken tamu?” at pekibat na, “malapit ya mu yan koya! Lakaran ta ya mu… miras kata bayu meugto!“

Linawe ne ning lalake ing relos na, alas-onse kwarenta ning abak (11:40), bayu alas-dose miras la. Awa malapit ya mu pin siguro, anya pin tikyan na ne ing kulot.

Kabang maglakad la, apansin na halos ala nang bale keng dadalanan da…. pero sige lakad la pa rin. E na apansin pasado alas-dose na keng relos na. Diretso ya pa rin keng lakad ining kulot, at iya pilit neng tatagalan, pablasang mapagal ne anya medyo makupad neng lumakad.

Linabas la pa keng palat… atin la pang delanan a sapa… ngeni atyu la king medyo masukal ampong matanaman a lugar. Medyo maplas ne dungus ing lalake anya linawe ne ing relos na, mipakirut ya uling pasado ala-una na!

Inaus ne ining kulot at saka ne simbatan – “saguli na abe, paglokoan mu ku yata! Nandin kata pa lalakad, angga ngeni eka ta pa miraras!”

Pekibat ning kulot, “ali koya, malapit ne mu. Saguli na kanyan”

Keni ne mibua ing lalake “Nandin ka pa malapit! Kalaut ta na lekaran! Pasado ala-una na e, maygit ta nang metung oras maglakad! Bala ku sang miras kata bayu meugto?!”

Medyo mipakirut ya ing kulot uling matas ne boses ing lalaki, linawe ne at saka ne pikabitan – “Bakit koya? Meugto ta na wari?”

Mate keng mayli anyang kinuwento ne kekami ini.

Wapen naman, ela pa man meugto. Anya e ya mali ing amanuan na ning kapatad ta’ng kulot.

Eku balu nung ing kwento ayni, yapin ing penibatan ning amanuan dang kapanurong baluga (pasibayu pu, panupaya), pero andat makaramdam kung makibat na “karin” o “atyu ya ken” ampong “keta o“, agaganaka ke ing kwento ayni.

Sana aburi ye mu rin.