Salamat na mu keng patak ning uran
Misalikut sakit a kanakung panamdaman
King lalam ning dalumdum ampong patak ning danum
Anti ya mo kanaku ing banua maki-agum

Kabang ing uran durugpa king kakung lupa
Makisabe na ring tutulo ing kanakung lua
Ing puso ku kasalukuyan yang manangis
Uling ala naman kanakung manapis

Paburen me pang patak, e ka pa tutuknan
Keng kanakung lungkot, ume mu kung damayan
Isalikut mu ku king patak, patak na ning uran
Ala nang dapat makabalu keng pusu kong manamdaman

Dakal salamat… salamat keng uran…

——————————————
Roy
July 29, 2010
10:04 pm
Angeles City
Philippines

*minuna ya pung mipaskil king Meqeuni Cabalen

Ume na keng mulayi, anting misasaglulu
Patse dimdam mi ne siuala ing bacting nang Kong Pidio
Iyamu ing panenayan, abatan mi keng dalan
Ba kaming makasali ketang sorbetes nang manyaman

Neng aliwang aldo, lalo na neng kauran
Aliwang klaseng bacting ing kekaming daramdaman
Kilityan a mais, metung ya pang manyaman kanan
Pane ku pang kukutang kanita, “Atin bang mais a pengilityan?”

Keta king dalan makayabe kaming kareng kalipunan reng kayanakan
Buburak, gagabun, atin pang sipunan
Manaua keng mamyalung ampong mitatagalan
Balu da reng pengaring e da ke pigaganakan

Ngening panaun a minasenso ne ing tao
Ing dalan tamu e ne malyari mu man pipamyalungan
Nu’ne masalusung saken, dakal la reng tulisan
Pota kagulut mu, kabud ne mu ala ing anak a pakamalan

I Kong Pidio e ku ne abalitan mu naman
Deng magtindang sorbetes, melagad na la naman keng dalan
E wari manyaman pandesitong sorbetes ing palaman?
Atin waring makanyan ketang “mall” tamung papasyalan?

Panupaya na mu pu nung aganaka kung balikan
Kasimplian ning bie, ing saya anyang kayanakan
Apapalabas me ing patingapun mamyalung king dalan
Menasa’t neng kayi, muli na ka mu para mangan.

—————————————
Roy
August 6, 2010
9:15 pm
Angeles City
Philippines

*pakibat keng binye ning kaluguran a Arnel Guitierrez a “bacting kalipunan ampong sorbetes” para  keng kanakung “Challenge me to poetry” ketang kanakung Facebook.

Paldak-sikaran na ning kakaluluan
Alang kapanintunan, alang apangan
Anya pin oita, kamamaranunan
Malutung kabayo, kayang tatalnan

Bina neng sangkanan ing gobyerno
Uling masyado lang kurakot kanu
I-una de ing sarili king pamanako
Anya ala nang miraras karelang pakakalulu

Kaybat nang peg-dipaning alti deng manungkulan
Deng makuwala’t atinan deng kayang atupan
Masyas la kanu batal, tiktak keng kaymutan
E da buring idake ing karelang kabyayan

Halos aldo-aldo keta king umpukan
Makanyan ing kekang ababatyawan
Deng aliwa ala la pa mong imalan
Kabang mipapagbida la  king karelang kamalasan

Metung yang dake ini, e ne man kabuuan
Ning sosyedad a kekatang kabibilangan
Salamat namu atin mapilan a magkusa
Aintindian dang keng sarili dapat munang mamasa

Paldak-sikaran, nanu nang kapuntalan?
Patse ing kamalasan, eguran me pang katamaran
Sukat me bang i-asa ing swerte karelang aliwa?
O manunyat ka’t kimot, ika ing manibala?

Paldak-sikaran, nanu ing kekang gawan?

————————————————-
Roy
May 21, 2010
7:25 AM
Angeles City
Philippines

Kinaul mu ne ba ing kekang inda?
Keting aldong  maka-agpang para kaya
Pamigaganaka king kayang pamaglingap
Ampo king kayang lugud alang kupas

Patse abak paligpit ne ing kekang pagkeran
Sukat ka bang maminto o magmamaklakan?
Patse lelele na na ing pipanganan
Migkusa ka bang sinabing “Ima, aku na kanyan”

Pablasang kekata sigurong akaragulan
Ila ing inda, yan ing karelang takda
Dapot malalating bage asaup ta karela
E ta mu balu, asno king kasaya

Sigurado ku e no man manintun o mangwenta
Pauli na ning karelang lugud kekata
Pero mananu na mo itang paramdam ta karela?
Ibalik ta mu ing lugud a dinake na.

Kinaul mu ne ba ing kekang Inda?

———————————————-

Roy
May 9, 2010
7:13 AM
Angeles City
Philippines

Pagkapilitan kung makasulat kawatasan Kapampangan bista man e makanita kalalam ing kanakung kebaluan king kekatamung Amanung Sisuan. Nga ku na pin sinabi ketang tatauli kung kawatasan a “Bingut ku pa mu naman,” e ku pa matalustus ampong dakal ku pa kanan a nasi.

Dapot, king kasimplian da ring kanakung obra, mikaswelo ku pung abalu a miyabe la kening kamalig na inaus dang Kawatasan Kapampangan a gewa na pu ning kekatamung kapatad a i Papa Osmubal.

Ini pung bilungan a ini, maglaman yang asna karakal a kawatasan manibat pa kang Diosdado Macapagal angga na kareng watas na ning kekatamung panaun… at nga ku na pin, miyabe ya naman ing “magsasa” a kalupa ku.

Deti pung kawatasan a atyu keting bilungan a iti, pipagalan na la pung kinalap ampong penyaliksik Papa Osmubal para mika-metung a imbakan a nung nukarin akit da la ngan deng miya-aliwang obra da reng Kapampangan a watas — matua ampong anak, bang e la masayang ampong sukat na lang lumbog nung alang magmasabal manyikap kareti.

Tutu ku pung maswelo anyang abalo kung inabe na lang Papa Osmubal deng kanakung obra. Pakiramdam ku tuloy, metung na ku naman watas anyang mi-abe ya ing lagyu ku kareng watas a atyu keti.

Ampong sigurado ku, maragul ya naman saup iti kareng anak a magaral uling abalu ku na makayabe ne ing Kapampangan king karelang panigaralan anya potang kayi, kabud na la manintun kawatasan Kapampangan.

Ngeni, agkatan da kayu ngan pu, matua’t anak kening bilungan a gewa nang Papa Osmubal a nung nukarin makatipun la ngan deng kawatasan a Kapampangan.

Ampo nung atin kayu pang balung kawatasan at e yu la ikit karin, sabyan yu la pu kaya at malugud na la pung iyabe. Uling iya pu ing kayang parasan, ing akalap no ngan deng egana-ganan kawatasan ketang kayang kamalig.

Dakal pung salamat Kang Papa Osmubal keting gewa mu ini. Maragul yang bage para keng pamaglabung na pang lalu ning literaturang Kapampangan.

Luid ka Papa Osmubal!

Luid ya ing Amanung Sisuan!

Bingut ku pa mu naman
Kanaku ya yang aminan
Patse ing pisasabyan
Ing amanung Kapampangan

Nga ku na pin mengamanu
ketang metung kung kawatasan
“Kalambat ku palang mulala!“
Pero ngeni, mimulat na ku king masala

Dapot antimong magumpisang tatakbang
Mengari kung bingut, ume ku pang gagapang
Nga ra pin, dakal ku pa kanan a abyas
Bayu ke ayaus ing sarili kung metung a watas

Ing tutu, e ku pa taganang matalutus
Ing kanakung beluan, dakal pang kakulangan
Anya pin karagul ku pasalamat kang Kang Ernie Turla
Kaniting binye na kanakung Diksyonaryung Kapampangan

Ngeni, magsilbi ya iti kanakung metung a armas
Kambe na ning kanakung bilungan Kapampangan
Sisikan ku lub tataleten ke ing dalan
Bang lumabung pang lalu ing kanakung beluan

————————————————————–

Roy
April 1, 2010
5:50 PM
Angeles City
Philippines

Para kareng e pa mekapamasa, pepekat ku la pasibayu keni, ibat ketang luma kung Kapampangan blog, deting miyayaliwang birung akalap nung nukarin, bang mipakayli la adyang bagya mu.

Para naman kareng mekapamasa na, basan tala pasibayu, at pihong mipakayli tamu ulit.

Tinipun a kalokoan, Kepampanganan!

Miyayaliwang biru o kalokoan a akalap ku kareng palele-lele, at saka ko Kepampangan… makatula la pa rin kaya?

Lawen tala.

E maluglug
Lalaki: “O joe, malyari mo potang mamipi ka, pakaluglugan mu ing imalan!”
Babai: (mimwa ya) “Aba! Sikan mu lub magsalita! Pakaluglugan ku yan a! Nung makatatlo mu luluglugan ku yan!”
Lalaki: “Ika naman joe, paglaraman mu ku pa”
Babai: “O’t sinabi mu naman maglaram ku?!”
Lalaki: “Makanano napun pauli ku, mirasnan ku uran keng dalan… binula ya ing imalan ku anyang mebasa ku king uran!”

Ing Penibatan
Lito: “Ima, nukarin la pu menibatan deng tau?”
Ima: “Menibatan tamu anak kang Eba ampong Adan, Ila reng minunang lelengan ning Apung Guinu. Ila reng pipulpulan tamu”
Lito: “Bakit sabi ng Tatang ku, menibatan tamu kanu kareng matsing?”
Ima: “Balu mu ‘tong, ustu ya rin naman i Tatang mu e…”
Lito: (gagamus ya buntuk) “Makananu ya pung ustu, aliwa ya ing sinabi yu? Ikayu ing mali?”
Ima: “Ay! ali ‘tong, ustu ya itang kanaku, ustu ya naman i Tatang mu… kasi itang pekibat na keka, karen yang partido na ita”

E Tatakut
BRUNO: Nanu ya ing papel a yan?
PEDRO: Listahan da reng taong tatakut kanaku
BRUNO: Dipane! O’t atyu ya ing lagyu ku keni?!
PEDRO: ‘Ta bakit? Eka wari tatakut kanaku?!
BRUNO: Ali ku! Bakit?!
PEDRO: O e di, buran ke! Ala namang kasu kanaku ita!

Deng bayung kasal
MRS: Darling… malapit ta ‘nang maging atlu kening bale
MR: Tuto darling?! Apasaya mu ku keng balita mu ‘yan!
MRS: Wa darling…. keni ne tuknan i ‘ma ku

Ing asawa
Manyaman yang matutud ing babai ampong maninap… anyang bigla yang ginulisak: “Ligwa mu, awyan na ing mister ko!”
Tinalakad ya ing kasiping nang lalaki at saka linundag king awang… at saka na aganaka: “Alte! Akung mister na e!”

Ing Anak a makulit
Anak: Salwana pung ubas!
Tindera: Ala kaming ubas
TUTUKING ALDO…..
Anak: Salwana pung ubas!
Tindera: Ala kaming ubas
TUTUKING ALDO PASIBAYU…..
Anak: Salwana pung ubas!
Tindera: Sabi nang alang ubas e! Patse mengutang ka pa, istepler ku ne ing balungus mu!
TUTUKING ALDO NA NAMAN PASIBAYU…..
Anak: Atin kayu pu stapler?
Tindera: Ala…
Anak: Salwana pung ubas!

Sana pu mipakayli kayu, adyang makananu mu

Pilan nang aldo, mag-umpisa na rin ing kampanya kareng kakandidatong opisyales ning balen. Sigurado mu, masigla masaya na naman kanta.

E ta na alako, ala namang kaso kanaku nung masigla masaya, makanyan talaga mangampanya la e.

Pero makanita man, atin ku po sanang pakisabing mayap kareng kekatamung kandidato… nung malyari mu po sana… ne?

Ing pakisabi ku po, simple ya mu po.

Nung malyari mu po sana, e ta sana basta-basta mamakat sticker o nanu pa mang papel kareng bakod ampong gate da reng miki-bale… lalung-lalo na nung alang paintulot… ampong lalung-lalo na nung aliwa naman pala ikayo ing buri dang suportan.

E yu po siguro balu, dakal ing mibibili king alanganin pauli na ning kabud na mu atin makapakat a litrato na ning metung a kandidato king gate na ning metung a memalen. Intindiyan ta mu po sana ita.

Ampong e na kalupa ning sigla, a nung nukarin kalabas yu, ala nang masigla. Deni pung pakapakat a reni, neng angga nang tutuki pang eleksyon atyu la pa. Ni e yu la man aganakang palinis.

Balu ku, atin pung makatulid o makatalagang lugar a nung nukarin pwedeng mamakat stickers ampong posters. Karen pung residential, palage ku po, atyu na kareng mikibale ita.

Pakisabi mu pong mayap, uling balu ku aliwa naman ikayo ing mamakat karen, turuanan ta la po sana reng tao tamu a manyad permiso kareng mikibale bayu la mamakat kareng gate da ampong pader.

Pakisabi mu pong mayap.

Dakal pung salamat!

Kwentuhan tamu pa.

Ating metung dyip a mamasada, ing ruta na C-point–Holy–Hi-way, detang kule blue. E ne man masyado malati, e ne man masyado maragul… anaman ya ing bangko misusumangid.

Ing dyip a ini, magbiyahe ne papunta na king SM Clark, buring sabyan, dinurut ne palengke ning Angeles, pisamban maragul, Holy, Sto. Entierro, ampong AUF.

Medyo, miswert’yan ya king biyahe ing kaluguran ta’ng driver. Karas na pa kasi king main gate in Marisol, sapak ne. Mipa-intagun, SM la ngan kuldas pare-pareho ding pasaheros na… anya pin diretso ne mu ing byahe.

Bista man sapak ya, tahimik king kilub ning dyip uling e no man mikikilala ding pasaheros.

Atin metung a babaing malagu a medyo sosyal a maka-min skirt, busy ya mo kanung mag-text, atin naman metung a balamu atin yang sariling yatu uling atin makasaksak earphone king balugbug na. Atin pang aliwang maka-uniform saleslady ning SM at ding aliwa naman, mamasyal la siguro.

Diretso yang mag-biyahe ing dyip – alang alingasngas, alang traffic, alang aberya. Masanting ing aldo.

Anyang kumorba ne ing dyip ketang 1st St., papunta ne SM, biglang ating siningo e masanting a bau. Balu yu na siguro ing buri kung sabyan… atin minatut (panupaya pu).

Alang bubulad, kabud la magtakap arung ding pasahero… medyo mipaglalawe lang pasimple. Ala la man kasi dimdam e. Oneng balu ta’ naman ing atot, nung sanu ing tahimik, ya ing mabagsik.

Natural mu, alang mamamin kareng pasahero. Ing drayber, silip-silip ya ketang salamin na… titimplan no siguro ding pasahero na.

Maligwang salita, miras ya terminal ning SM ining dyip a ala pa rin bubulad.

Ume na lang kuldas dening pasahero uling miras na la pin terminal, anyang bigla yang minirit ing drayber…

“Saguli mu pu, ita pung minatut… ali ya pa po memayad.”

Kabira-bira, mekibat ya itang babaing malagung maka-mini… “Oy! Excuse me, memayad na ku!”

Metung ka ba kareng Holy Angel alumni?

Mekapag-attend na ka kareng homecoming a magaganap balang Disyembre na ning banwa?

Nung alumni na ka ning Holy Angel, ke makapag-attend na kang homecoming o ali pa, buri ku mung pabalu ing blog a nung nukarin makapamasa kang balita tungkol king preparasyon para king homecoming king banwang ini.

Wapin pu yan ing HAU Grand Alumni Homecoming a kanakung gewa bilang miyembro na ning Primemovers Batch 85 a maging host na ning homecoming ngeni.

Deng kasalukuyan makapaskel – Bakit importante in homecoming? Makananu kung makasaup? Ampo deng tutuking batch meeting.

Mapalyari pung asabi yu na para ya mu king batch mi blog a ini, ali ya po. Para ya po kareng buong alumni na ning Holy Angel University ing blog.

Uling ikami po ing host ngeni, makanyan madalas yang mababanggit ing batch, pero deng impormasyon, para ya kareng egana-ganang graduate na ning Holy Angel.

Kalupa na pu ning sinabi ku, makabasa kayong updates tungkol king homecoming, miya-yaliwang articles tungkol king homecoming, ampong samu’t-saring kwento tungkol king kekatamung alma mater.

Agkatan da kayo pung mamasyal ketang blog tamung ita – ing blog para kareng alumni ning Holy Angel. Mas masanting nung makapagsubscribe kayo para tambing kayong ma-update patse atin bayung misulat karin.

Mikit-ikit tamu po king alumni blog… at para mas masaya, mikit-ikit tamu king homecoming king daratang a Disyembre.

Dakal pung salamat!