Metung ka ba kareng Holy Angel alumni?

Mekapag-attend na ka kareng homecoming a magaganap balang Disyembre na ning banwa?

Nung alumni na ka ning Holy Angel, ke makapag-attend na kang homecoming o ali pa, buri ku mung pabalu ing blog a nung nukarin makapamasa kang balita tungkol king preparasyon para king homecoming king banwang ini.

Wapin pu yan ing HAU Grand Alumni Homecoming a kanakung gewa bilang miyembro na ning Primemovers Batch 85 a maging host na ning homecoming ngeni.

Deng kasalukuyan makapaskel – Bakit importante in homecoming? Makananu kung makasaup? Ampo deng tutuking batch meeting.

Mapalyari pung asabi yu na para ya mu king batch mi blog a ini, ali ya po. Para ya po kareng buong alumni na ning Holy Angel University ing blog.

Uling ikami po ing host ngeni, makanyan madalas yang mababanggit ing batch, pero deng impormasyon, para ya kareng egana-ganang graduate na ning Holy Angel.

Kalupa na pu ning sinabi ku, makabasa kayong updates tungkol king homecoming, miya-yaliwang articles tungkol king homecoming, ampong samu’t-saring kwento tungkol king kekatamung alma mater.

Agkatan da kayo pung mamasyal ketang blog tamung ita – ing blog para kareng alumni ning Holy Angel. Mas masanting nung makapagsubscribe kayo para tambing kayong ma-update patse atin bayung misulat karin.

Mikit-ikit tamu po king alumni blog… at para mas masaya, mikit-ikit tamu king homecoming king daratang a Disyembre.

Dakal pung salamat!

Balloon Fiesta, yan ing aus mi ding anak ku keng Hot Air Balloon Festival. Patse atyu ne ing Enero pirming antabayan mi ya ing kaganapan a ini. At ngeni ping banwang ini, maganap ya iti king bulan ning Pebrero.

Matula kami ding anak ku patye akakit mi lang balamu gagato la mu king babo kayabe da reng ulap. Asno kasanting lalawen lalu na miyayaliwa la hugis ampong kule.

Aganaka ku pa anyang makatuknan kami pa Bagongbayan king Cutcut, migigising kami uling lalabas la mismo keng tulid mi. Asne kasigla itang karelang makinaryang magpalual api para mihanginan ya itang maragul a lobo. Asno mu kababa, anya pin na ke kasayang mipapamilya adyang pang meistorbo kami tudtud.

Ngeni, babalakan kung minta king Clark king a-onse ning Pebrero hanggang katorse nung kapilan ya maganap ing ka-labinlimang Hot Air Balloon Festival.

Kanyaman sigurong sasake kareng lobong areta, oneng tabalu mu nung e ku mitakutan. Pota malilyu ku mu.

Ninu pung munta? Mi’kit-ikit tamu karin.

Kabang ala ku pang balung isulat kening kanakung Kapampangan Blog, pabusten yu pung ituloy ke pa ing pamag-lipat ku karetang aliwa pang makapaskil ketang luma kung blog a Kapampangan.

Aku na pin ketang minuna, ditak-ditak ilipat ku la detang aliwa nang laman nita uling ali ku ne i-update ita pauli ning ini na mu ing kanakung imentenang blog king Amanung Sisuan.

Ini pung sinulat kung ini, tungkul ya kareng obserbasyon ku kareng ali-aliwang ugali da pu ring pasaherong Filipino. Nung sakali man pu, atin mituran, panupaya pu, obserbasyon ampong sarili mu pung opinyon ini.

Ding miyayaliwa dang dapat ding pasaherong Filipino:

Deng mahilig keng harap
Kerakalan deng lalake reni, oneng atin mu naman babaying makanini. Ala naman marok kanini, uling mas komportable ampong e ka mangadamusak a bitis kareng sasake ampong kukuldas. Asabi ku naman, metung ku naman karetang mahilig lulukluk king harap.

Apansinan ku mu neng minsan, patse makasake ku harap. Ating makisiping, adyang ala ya man laman king gulut! Ing amanuan ku itang ala talagang pasahero ne, ali ku sasabyan maliwalas. Makisiping la pa rin keng harap, adyang makanita man. Deta retang talagang masyadong mahilig keng harap.

Deng kapit-tuko king gulut
Kabaligtaran da reng mahilig keng harap, deni retang ketang sulok keng gulut. Nung apansin mu patse sake na ka, panyiksik de ing buldit da ketang suluk, balamu mo wari kukunan me itang lugar na.

Ala mu naman marok kanini. Pakisabi ku mu sanang mayap kareng taong a reni, potang ating sasake, pakilisya da la reng bitis ampong tud da. Ampong paki-abutan da na la rin sana deng gamit dang mabayat reng sasake, lalu na reng matwa.

“Malapit ku mu po”
Neng kayi medyu malulukami ku kareni, nung makalukluk ka ketang gulut, padusugan da ka ba lang milukluk. Kapate do reng kapit-tuku reni uling buri da pin ilang atyu keng dulu.

Nung matwa o masakit ya, apanupaya me pa. Pero nung masikan ne man, maybug meng gulisakan “malapit ka pala, o’t e na ka maglakad?!” Neng kayi kasi, adyang maliwalas keng kilub, palakwan da ka e. Mamili lang bangko da!

Deng manenayang ipus
Deni ring sablang kasaman ku! Kalupa da la naman deng kakadwa reni, kapit-tuko la naman keng gulut. Akit mu la reni potang sake ka king dyip, atyu la ketang dulo ning dyip. Ala yang aliwang sake ing dyip nune ‘ya kabud, asne kasandal ketang suluk, ne kakampante.

Kasake mu, neng kayi e pa man tatagkil ing buldit mu keng bangko, damdaman me “ayni pung bayad ko! pwede pung paki-abot?” Maybug kang misdan! Ala naman marok keng maki-abot, oneng maybug kung kutang karela, “buring mung sabyan, nung e ku sinake e ka mamayad?!”

Ali la siguro, ala lang ipus e. Anya pin panenayan de pang sake ing ipus da.

Deng mag-maklak-maklakan
“bayad po! pwede pong paki-abot?” “paki-abot na po ing bayad,” “ayni pu ing bayad ko” kulang na mo gulisak na ka, e na ka pa rin pansinan. Halos iharap mu na king lupa na ing bayad mu, ala pa ring kwenta!

E ko pa mekatupang makanini? Maswelo kayo! Menakit na ku, e mu minsan. Apansin ku, sasaryan da! E la talagang bisang manabot bayad! E la bisang maging ipus. Asno kanyanman sagapan ne! Atin ku kakilalang mismong makanyan.

Bala ku, maliban kareng mebanggit, atin pang aliwa. Aku pin anyang muna keng isulat ini, atin ya pang kakadwang dake. Sana ayari ku ne kanyan, ba keng atuki keni.

Deni pu ilang kanakung obserbasyon. Pasibayu pu, kanaku mu pu. Nung atin menasakit, e pu sasaryan.

Dakal pung salamat.

E ku lubus aisip, ampong e ku aintindian!

Makananu nang ayagyuan ning kekatamung presidente – o pakibalak mu man, na magin yang kongresista kaybat nang miras king pekamatas a luklukan ning kekatamung bansa?!

E ku balu nung penamdaman yu, pero aku balamu metampaling ku! Bilang metung a Pilipino… bilang metung a Kapampangan.

Ala ya man kanung lebagan a batas. Sabi da ring mayap tamung mambabatas, legal ya kanu ing gewa ning kekatamung presidente. Ing babawal na mu ning kekatamung batas, ing tagal ya pasibayung presidente ing metung a makalukluk.

PERO! e na babawal na ing presidente tagal ya pang aliwang posisyon, adyang pang mababa ya pa.

E da ka ‘ta minurit kanita?!

Lunto kaniti, kasalanan da pa retang minunang memalangkas king kekatamung konstitusyon. Pekibalak da na ing metung a presidente, pota talnan neng malambat ing posisyon, kalupa ning milyari kang Marcos kanita. Mu pin, e da pekibalak na ing presidente tagal ya pang aliwang posisyon.

Siguro, e da isip-isipan kanita na ating matinung presidente a mamalak tagal pang mas mababang posisyon kaybat nang milukluk king pekamatas a bangko.

Ulitan ke ne - “Alang matinung presidente ing magnasa pang mas mababang posisyon kaybat nang milukluk king pekamatas!”

Balamu ustu no man, ne?

Dakal a sasabi, metung ya kanung paralan ini ba yang maka-”kalawat” king upaya… king miyayaliwa nang kasasangkanan.

Atin nang, ba yang mikaproteksyon kareng asunto ampong kaso a ibalandra da kaya kareng mengapalyari king administrasyon na, potang ali ne presidente.

Atin namang sasabing, balamu “stepping stone” ya ini papunta king gobyernong “parliamentary” a nung nukarin ing kekatamung kasalukuyang presidente, mitutuk ya bilang prime minister kanita.

Makatakut!

Anya pung umpisan keng isulat ini, ing original na pung titulo, “Apagmaragul mu bang Kapampangan ka?”

Kasi pin po, keng gewa nang Gloria balamu maragul yang kamarinayan kekatamu. O’neng medyu melunus ku king sarili ku, anya pelitan ke.

Ngeni pu, ing buong Pilipinas… i-abe mu ne ing buong yatu, makabande ampong makalawe kareng Kapampangan… kekatamung Kapampangan, pabusten tamu ing buri dang malyari? O kimut tamu’t tuldukan na ing pamamuklat ning makatakot a istorya ning kekatamung bansa.

Sana mu, kaybat ning eleksyon… makapagmaragul tamu pang Kapampangan.

Tutu tamu ping maswerte keti Angeles. Ketang milabas a Sabado ikit tayang menalasa ing bagyong Ondoy keti Pilipinas. Medyo magreklamo ku pa rin kanita uling alang power kekatamu. Pero isipan ku na na dakal mituwag a tanaman ampong poste.

Kareng aliwang lugar, mas grabe pa ing milyari. Ikit ‘ta no man siguro retang mengalbog a lugar king Metro Manila. Pati retang e dating lulbug, limbug na la naman.

Kasalukuyan, puspusan ing fund raising drive da reng miya-aliwang organisasyon keng aliwa-liwang lugar keti Pilipinas. Kareta pung bisang sumaup ampong mag-donate, pwede yu la pung lawen deng paralan nung makananu kayong makasaup keni. Aku pu, ing ginamit kung sumaup apin itang king TXTPower uling ‘yang pekamaligwa para kanaku.

Oneng ken la ngan pung halos Metro Manila deng atyu ken. So far pu, ala ku pa pung ikit a ma-o-organisa para kareng Kabalen king Pampanga. Simap itang metung kung kaluguran, mig-post ya king facebook na.

Buri ke pu sanang idake keni para karetang bisa pang sumaup kareng kekatamung Kabalen. Ayni po ing pinost na keng profile na.

Let’s all help and support “OPLAN SAUP CABALEN “. We are appealling to all noble and kind hearted kapangpangans. Cash/Check donations can be forwarded to UCPB BANK-Account Name KIWANIS CLUB OF ANGELES CITY-Account # 221-002043-3. Donations in kind can be dropped off at ST PEREGRINE CLINIC-291 francis st. Nepo Sub Angeles City.Beneficiaries are landslide affected families in Arayat Pampanga. Thank you

Opo, mika-land slide pu anyang kasagsagan ning bagyo king Arayat at dakal la pung mangailangan saup kareng Kabalen tamu karin.

Sigurado ku pu, den mu namang aliwa-liwang organisasyon, iskwela, ampong pisamban mika-proyekto la naman para makatipon saup para kareng mi-apektuhan king bagyo. Malyari tamu pu sigurong mangutang kareng kakilala tamu kareni nung makananu tamung makasaup.

I-post ku la naman pu potang ikit ku la bang abalu da pa reng aliwa tamung Kabalen.

Mangadi tamu pu na sana akabyusan ‘ta ya ing pagsubok a ini, ampong sana dakal la pang datang a saup kareng mituran kang bagyong Ondoy.

Dakal pung salamat.

Update:
Keng tulid ning Museo Ning Angeles king Sto. Rosario St., atin lang booth deng Councilmen’s League a nung nukarin tatanggap lang donasyon. Pwede kayo naman pu sigurong magdalang saup Karin.

Buri ke mu sanang idake ining king kung makapaskel king eskwela ning anak ku:

Search for the 2009 Most Outstanding Kapampangan Awardess

Nung sakali man pung atin mipalili keni at ikit ye ini, baka sakaling atin kayung kakilala a malyari yung i-nominate keni.

Hangga mu pung October 11, 2009 pwedeng mag-submit nominasyon. Para pu kareng kategorya, kwalipikasyon ning nominado ampong makananu mag-nominate, malyari ye pung lawen ing detalye kening metung ku pang blog, o kaya munta kayu king website ning Pampanga Capitol.

‘Ya mu pu ita, at sana lumabung ya pa ing Amanu ampong Kulturang Kapampangan!

Manibat king diktadura, dinaun mu ing demokrasya
Uling tinggap mu ing aus na ning balen keka
Metung a simpling mebalung inda
Keti king Pilipinas ika ing menimuna

Kayari ning katungkulan, tahimik kang kinuldas
Linipat me ing upaya king kapalit, a alang alingasngas
Dapot adyang keta king palasyo, aliwa na ika
Makabante ka pa rin, anti ing metung a mayap a inda

Ing siwala mu, dakal pa ring makiramdam
Uling balu ming mayap ing kekang parasan
Angga king katataulian, keka ya pa ring pakilaban
Ing demokrasya, keka yang papanatilian

Ngening minuli na ka, kambe ning kekatamung Ibpa
Bista man melakwan kaming manangis, mangaga
Ing isipan mi na mu, meyari na ing kekang sakit at dusa
Aintindian mi a ing delanan mu, masakit yang bina

Dakal pung salamat king kekang pepamana

———————————————————–
Roy
August 1, 2009
10:29 PM
Angeles City
Philippines

Ing atyu king litrato king kaili, ‘ya pin i Giovanni Balingit at ing kayabe nang gagalamanuan na, alang aliwa nu’ne ing dating presidente ing America a i George W. Bush.

Ninu wari i Giovanni? O ngeni mo nung atyu a ken? Ninanu ya o’t gagalamunan ne i Bush?

I Giovanni, o “Giovy” kareng kakaluguran na, metung ya pung Filipino ampong Kapampangan! Kayabe ne pu i Bush king litrato uling tinangap ya pung parangal manibat mismu king presidente ning America.

Medyo mebigla ku pa pin pu anyang ikit ke ing balita king Inquirer, uling i Giovy pu, adyang e yu akukutang, akaklase ke pung high school keng Holy Angel, Batch 85 kami pu, wapin ing Primemovers ngeni.

Anya pu palang memakbung ya ing Pinatubo, minta ya king US uling metanggap yang US Navy. At king pamagsilbi na king US Navy, keakitan de pung dedikasyon ampong kusa king kayang serbisyo. Anya pu maligwa yang meging officer.

Ing tinggap nang parangal ya pin pu ing Bob Hope Awards, metung a pamagkilala king serbisyo binye na migit pa king aus ning kayang katungkulan.

Ing mesabing parangal, mibye ya pu kaya anyang Setyembre na ning milabasan a banwa.

Dapat taya pung ipagmaragul, ing kekatamung Kabalen ampong Kababayan.

Luid ka Giovanni!

Abalitan ta na anyang milabasan Sabado na mig-deklara yang suspensyon ning klase kareng kolehiyo ing talapamuntuk ning CHED a i Emmanuel Angeles. Anya pin ing anak kung magaral king Holy Angel, imbes na magumpisa neng magaral ngeni, midagdagan ya pang pitong aldo ing painawa na.

Pero detang adwa kung anak — metung a high school magaral king Pandan, ampong metung elementary a magaral king Holy Family, atin lang klase!

Balu tamu na ing sangkan ning panga-suspinde ning klase kareng college ya’pin ing A(H1N1) o awsan dang swine flu. Makapagtaka mu pin, nung sanu reng malati ilang paburen dang mag-klase.

Sabi ning DepEd, kareng private school, deng administration da reng iskwela ila nang bahalang mag-deklara nung bisa lang mag-suspend. Pauli na kanu ning ala yang upaya ing DepEd kareng administrative da reng private school.

Makanita ba ita? Pero deng public, pepag-klase na la pa rin!

Manibat pa anyang minuna, ing tutukyan na ning DepEd ing sasabyan na ning DOH na ala pa kanung ’cause of alarm’ uling e pa makanita karagul ing panga-kalat na ning sakit keti Pilipinas.

Mapalyari sigurong tutu ita, mapalyaring ustu la. Pero bilang metung a pengari, e mu aiwasan ing misip ampong migaganaka siyempre.

Ngeni, ala tamung agawa, anggat ali ya mag-deklara ing DepEd o ing munisipyo man, nune panabilinan tala ring kekatamung anak na mimingat la – lagi lang manos gamat, e tatalan maski nukarin, ampong lalaut la karetang amanan-manan dang sisipun.

Kakadwa na pu nita, at mas maulaga – mangadi tamu. Pangadi tamu na sana ining virus a ini, kambe da pa reng aliwa pang sakit a kakalat keng yatu ngeni, sana tuknan na ngan bang mabawas o milako na ing kekatamung kapigaganacan kareng bage a reti.

This is a line for Technorati Profile

Kapabaluan mu pu, para pu karetang ali pa mikibalu (kalupa ku).

Ing aldo na pu ning May 7, 2009, Huwebes, local holiday ya pu keng Pampanga, para pagselebran ya pu ing Jose Abad Santos Day… ing aldo na pu ning kamatayan na ning metung a bayani ning Pilipinas ampong anac na ning Pampanga.

I Jose Abad Santos po, pete re ding sundalong Hapon anyang May 2, 1942 (pero kaliwa makasulat May 7 ya), uling ali ya bisang sunod ampong magpasakop kareng Hapon anyang World War II.

Mibait anyang February 19, 1886, i Jose Abad Santos ing ka-limang Chief Justice king Supreme Court ning Pilipinas. Anak nang Vicente Abad Santos ampong Toribia Basco, sukat a atyu king da ri Jose ing metung a magiting a rebolusnaryo, uling ing kapatad ning i Pedro Abad Santos ing metung kareng founder na ning Socialist Party of the Philippines.

Pero malaut na ku pu disnan, nung buri ye pa pung abalu ing kwento na ning kekatamung bayani, tukyan ye pu ing link na king Wikipedia.

Pasibayu pu, lalo na kareng negosyanto, kareng mag-banko, ba yu lang abalu reng iskedyul da ring kekayung babayaran, ampong sisingilan.

Holiday pu king May 7, 2009 king buong Pampanga, para pagselebran ya pu ing Jose Abad Santos Day.

Mayap a aldo pu!