Buri ke mu sanang idake ining king kung makapaskel king eskwela ning anak ku:

Search for the 2009 Most Outstanding Kapampangan Awardess

Nung sakali man pung atin mipalili keni at ikit ye ini, baka sakaling atin kayung kakilala a malyari yung i-nominate keni.

Hangga mu pung October 11, 2009 pwedeng mag-submit nominasyon. Para pu kareng kategorya, kwalipikasyon ning nominado ampong makananu mag-nominate, malyari ye pung lawen ing detalye kening metung ku pang blog, o kaya munta kayu king website ning Pampanga Capitol.

‘Ya mu pu ita, at sana lumabung ya pa ing Amanu ampong Kulturang Kapampangan!

Manibat king diktadura, dinaun mu ing demokrasya
Uling tinggap mu ing aus na ning balen keka
Metung a simpling mebalung inda
Keti king Pilipinas ika ing menimuna

Kayari ning katungkulan, tahimik kang kinuldas
Linipat me ing upaya king kapalit, a alang alingasngas
Dapot adyang keta king palasyo, aliwa na ika
Makabante ka pa rin, anti ing metung a mayap a inda

Ing siwala mu, dakal pa ring makiramdam
Uling balu ming mayap ing kekang parasan
Angga king katataulian, keka ya pa ring pakilaban
Ing demokrasya, keka yang papanatilian

Ngening minuli na ka, kambe ning kekatamung Ibpa
Bista man melakwan kaming manangis, mangaga
Ing isipan mi na mu, meyari na ing kekang sakit at dusa
Aintindian mi a ing delanan mu, masakit yang bina

Dakal pung salamat king kekang pepamana

———————————————————–
Roy
August 1, 2009
10:29 PM
Angeles City
Philippines

Ing atyu king litrato king kaili, ‘ya pin i Giovanni Balingit at ing kayabe nang gagalamanuan na, alang aliwa nu’ne ing dating presidente ing America a i George W. Bush.

Ninu wari i Giovanni? O ngeni mo nung atyu a ken? Ninanu ya o’t gagalamunan ne i Bush?

I Giovanni, o “Giovy” kareng kakaluguran na, metung ya pung Filipino ampong Kapampangan! Kayabe ne pu i Bush king litrato uling tinangap ya pung parangal manibat mismu king presidente ning America.

Medyo mebigla ku pa pin pu anyang ikit ke ing balita king Inquirer, uling i Giovy pu, adyang e yu akukutang, akaklase ke pung high school keng Holy Angel, Batch 85 kami pu, wapin ing Primemovers ngeni.

Anya pu palang memakbung ya ing Pinatubo, minta ya king US uling metanggap yang US Navy. At king pamagsilbi na king US Navy, keakitan de pung dedikasyon ampong kusa king kayang serbisyo. Anya pu maligwa yang meging officer.

Ing tinggap nang parangal ya pin pu ing Bob Hope Awards, metung a pamagkilala king serbisyo binye na migit pa king aus ning kayang katungkulan.

Ing mesabing parangal, mibye ya pu kaya anyang Setyembre na ning milabasan a banwa.

Dapat taya pung ipagmaragul, ing kekatamung Kabalen ampong Kababayan.

Luid ka Giovanni!

Kapabaluan mu pu, para pu karetang ali pa mikibalu (kalupa ku).

Ing aldo na pu ning May 7, 2009, Huwebes, local holiday ya pu keng Pampanga, para pagselebran ya pu ing Jose Abad Santos Day… ing aldo na pu ning kamatayan na ning metung a bayani ning Pilipinas ampong anac na ning Pampanga.

I Jose Abad Santos po, pete re ding sundalong Hapon anyang May 2, 1942 (pero kaliwa makasulat May 7 ya), uling ali ya bisang sunod ampong magpasakop kareng Hapon anyang World War II.

Mibait anyang February 19, 1886, i Jose Abad Santos ing ka-limang Chief Justice king Supreme Court ning Pilipinas. Anak nang Vicente Abad Santos ampong Toribia Basco, sukat a atyu king da ri Jose ing metung a magiting a rebolusnaryo, uling ing kapatad ning i Pedro Abad Santos ing metung kareng founder na ning Socialist Party of the Philippines.

Pero malaut na ku pu disnan, nung buri ye pa pung abalu ing kwento na ning kekatamung bayani, tukyan ye pu ing link na king Wikipedia.

Pasibayu pu, lalo na kareng negosyanto, kareng mag-banko, ba yu lang abalu reng iskedyul da ring kekayung babayaran, ampong sisingilan.

Holiday pu king May 7, 2009 king buong Pampanga, para pagselebran ya pu ing Jose Abad Santos Day.

Mayap a aldo pu!

Ikit ke king YouTube ini kabang manintun kung video da ring kanta o dalit a Kapampangan, wapin pu ini ing Anyang Malati Ku.

Metung a folksong a Kapampangan. Madalas ke pung daramdaman kanitang anak ku, at e ke talagang atatandanan ing kabuuan na.

Anya pin pasalamat ku pu at iki king YouTube. Pasalamat ku naman kang Tang Ernie Turla (ing magkanta king video) king kayang pamamiye pahintulot kanaku para ipaskil ke kening blog ku ing video na.

Ing Tang Ernie keng kasalukuyan atyu ya pu Oregon, ampong king palage ku pu malambat ne karin. Pero makanyan pa man, talaga pung ali ne kakalingwan ing Amanung Sisuan, at talaga pung pagpursigian nang mipalaganap ya pa.

At ing pamag-upload na kareng video a nung nukarin kakanta na la reng luma tamung kantang Kapampangan, metung ya pung epektibong paralan para kanaku, uling akakit da ring kayanakan tamu, at abuburi da la.

Luid ka Tang Ernie! Luid ya ing Amanung Sisuan!

Ayni na po ing video, ing Anyang Malati Ku a kinanta nang Tang Ernie

Luid ya ing Kapampangan!