Para kareng e pa mekapamasa, pepekat ku la pasibayu keni, ibat ketang luma kung Kapampangan blog, deting miyayaliwang birung akalap nung nukarin, bang mipakayli la adyang bagya mu.

Para naman kareng mekapamasa na, basan tala pasibayu, at pihong mipakayli tamu ulit.

Tinipun a kalokoan, Kepampanganan!

Miyayaliwang biru o kalokoan a akalap ku kareng palele-lele, at saka ko Kepampangan… makatula la pa rin kaya?

Lawen tala.

E maluglug
Lalaki: “O joe, malyari mo potang mamipi ka, pakaluglugan mu ing imalan!”
Babai: (mimwa ya) “Aba! Sikan mu lub magsalita! Pakaluglugan ku yan a! Nung makatatlo mu luluglugan ku yan!”
Lalaki: “Ika naman joe, paglaraman mu ku pa”
Babai: “O’t sinabi mu naman maglaram ku?!”
Lalaki: “Makanano napun pauli ku, mirasnan ku uran keng dalan… binula ya ing imalan ku anyang mebasa ku king uran!”

Ing Penibatan
Lito: “Ima, nukarin la pu menibatan deng tau?”
Ima: “Menibatan tamu anak kang Eba ampong Adan, Ila reng minunang lelengan ning Apung Guinu. Ila reng pipulpulan tamu”
Lito: “Bakit sabi ng Tatang ku, menibatan tamu kanu kareng matsing?”
Ima: “Balu mu ‘tong, ustu ya rin naman i Tatang mu e…”
Lito: (gagamus ya buntuk) “Makananu ya pung ustu, aliwa ya ing sinabi yu? Ikayu ing mali?”
Ima: “Ay! ali ‘tong, ustu ya itang kanaku, ustu ya naman i Tatang mu… kasi itang pekibat na keka, karen yang partido na ita”

E Tatakut
BRUNO: Nanu ya ing papel a yan?
PEDRO: Listahan da reng taong tatakut kanaku
BRUNO: Dipane! O’t atyu ya ing lagyu ku keni?!
PEDRO: ‘Ta bakit? Eka wari tatakut kanaku?!
BRUNO: Ali ku! Bakit?!
PEDRO: O e di, buran ke! Ala namang kasu kanaku ita!

Deng bayung kasal
MRS: Darling… malapit ta ‘nang maging atlu kening bale
MR: Tuto darling?! Apasaya mu ku keng balita mu ‘yan!
MRS: Wa darling…. keni ne tuknan i ‘ma ku

Ing asawa
Manyaman yang matutud ing babai ampong maninap… anyang bigla yang ginulisak: “Ligwa mu, awyan na ing mister ko!”
Tinalakad ya ing kasiping nang lalaki at saka linundag king awang… at saka na aganaka: “Alte! Akung mister na e!”

Ing Anak a makulit
Anak: Salwana pung ubas!
Tindera: Ala kaming ubas
TUTUKING ALDO…..
Anak: Salwana pung ubas!
Tindera: Ala kaming ubas
TUTUKING ALDO PASIBAYU…..
Anak: Salwana pung ubas!
Tindera: Sabi nang alang ubas e! Patse mengutang ka pa, istepler ku ne ing balungus mu!
TUTUKING ALDO NA NAMAN PASIBAYU…..
Anak: Atin kayu pu stapler?
Tindera: Ala…
Anak: Salwana pung ubas!

Sana pu mipakayli kayu, adyang makananu mu

Kwentuhan tamu pa.

Ating metung dyip a mamasada, ing ruta na C-point–Holy–Hi-way, detang kule blue. E ne man masyado malati, e ne man masyado maragul… anaman ya ing bangko misusumangid.

Ing dyip a ini, magbiyahe ne papunta na king SM Clark, buring sabyan, dinurut ne palengke ning Angeles, pisamban maragul, Holy, Sto. Entierro, ampong AUF.

Medyo, miswert’yan ya king biyahe ing kaluguran ta’ng driver. Karas na pa kasi king main gate in Marisol, sapak ne. Mipa-intagun, SM la ngan kuldas pare-pareho ding pasaheros na… anya pin diretso ne mu ing byahe.

Bista man sapak ya, tahimik king kilub ning dyip uling e no man mikikilala ding pasaheros.

Atin metung a babaing malagu a medyo sosyal a maka-min skirt, busy ya mo kanung mag-text, atin naman metung a balamu atin yang sariling yatu uling atin makasaksak earphone king balugbug na. Atin pang aliwang maka-uniform saleslady ning SM at ding aliwa naman, mamasyal la siguro.

Diretso yang mag-biyahe ing dyip – alang alingasngas, alang traffic, alang aberya. Masanting ing aldo.

Anyang kumorba ne ing dyip ketang 1st St., papunta ne SM, biglang ating siningo e masanting a bau. Balu yu na siguro ing buri kung sabyan… atin minatut (panupaya pu).

Alang bubulad, kabud la magtakap arung ding pasahero… medyo mipaglalawe lang pasimple. Ala la man kasi dimdam e. Oneng balu ta’ naman ing atot, nung sanu ing tahimik, ya ing mabagsik.

Natural mu, alang mamamin kareng pasahero. Ing drayber, silip-silip ya ketang salamin na… titimplan no siguro ding pasahero na.

Maligwang salita, miras ya terminal ning SM ining dyip a ala pa rin bubulad.

Ume na lang kuldas dening pasahero uling miras na la pin terminal, anyang bigla yang minirit ing drayber…

“Saguli mu pu, ita pung minatut… ali ya pa po memayad.”

Kabira-bira, mekibat ya itang babaing malagung maka-mini… “Oy! Excuse me, memayad na ku!”

Kiniyak na ku na naman
E ku balu nanung sangkan
Kabud na pinatak ing kakung lua
At e ku na apigilan

Kiniyak na ku na naman
O’t kabud na ku mengaga?
Tutu, agaganaka ke ing kanakung asawa
Pero sigurado kung ali ita ing sangkan

Kiniyak na ku na naman
O bakit kaya makanyan?
Malulukami na ku king sarili ku
Nanung migpa-lua kanaku?

Kiniyak na ku na naman
At saka ku biglang mipatiman
Aganaka ku na nung nanu ing sangkan
Mangili kung sibuyas, uling magluto kung apunan

——————————————
Roy
November 13, 2009
9:09 PM
Angeles City
Philippines

*Kapampangan translation ning kanakung tulang I cried again…

(Menibat ya pu ini ketang luma kung blog a Kapampangan, papaskil ke mu naman pu keni uling lilipat ku la ditak-ditak detang pwedeng ilipat menibat keta)

Kanita, atin ku akayabe keng obra a makwento. Asne karakal a balung biru o joke ara pin. Andat makalupung na kami, kakabid yang kakabid pauli na pin deng makatula nang kwento. Metung ya ini kareng paborito kung kwento na…

Misan a aldo kanu, atin metung a bayung-tao a miparas bandang Sapangbato. Kanita ya pa mekapunta ing lalaking ayni at ala yang kebalu-balu tungkol keng lugar.

Miras ya karin uli mong akutang na nung nukarin sasake papuntang Sapangbato. Ikwa na pin miras at kinuldas ne king dyip, ngeni atin na ne na naman problema. E ne balung puntalan ing pake nang lugar.

Ala ya rugung akit a apikutnangan na ing tao.

Angga king atagmuan ing metung kareng kapatad tang baluga (panupaya yu pu, makanyan ya pu kasi ing kwento e). Ala ya rugung akarapat at kaniti ya mengutang, sinabi ne ing lagyu ning lugar ampong taong kailangan nang puntalan.

Mityempo naman, balu ne ning ‘kulot‘ ing pantunan na! (e ku ne pa mu pu gamitan itang ‘b’ ne?) “Wa, koya balu ke yan! Bisa ka, saupan da ka pa!”

Karagul na pasalamat ning bayung-tao, adyang makananu mikamasala keng lakad na. Kitnangan ne ing kulot, “Malaut ya ba ini? Nanung saken tamu?” at pekibat na, “malapit ya mu yan koya! Lakaran ta ya mu… miras kata bayu meugto!“

Linawe ne ning lalake ing relos na, alas-onse kwarenta ning abak (11:40), bayu alas-dose miras la. Awa malapit ya mu pin siguro, anya pin tikyan na ne ing kulot.

Kabang maglakad la, apansin na halos ala nang bale keng dadalanan da…. pero sige lakad la pa rin. E na apansin pasado alas-dose na keng relos na. Diretso ya pa rin keng lakad ining kulot, at iya pilit neng tatagalan, pablasang mapagal ne anya medyo makupad neng lumakad.

Linabas la pa keng palat… atin la pang delanan a sapa… ngeni atyu la king medyo masukal ampong matanaman a lugar. Medyo maplas ne dungus ing lalake anya linawe ne ing relos na, mipakirut ya uling pasado ala-una na!

Inaus ne ining kulot at saka ne simbatan – “saguli na abe, paglokoan mu ku yata! Nandin kata pa lalakad, angga ngeni eka ta pa miraras!”

Pekibat ning kulot, “ali koya, malapit ne mu. Saguli na kanyan”

Keni ne mibua ing lalake “Nandin ka pa malapit! Kalaut ta na lekaran! Pasado ala-una na e, maygit ta nang metung oras maglakad! Bala ku sang miras kata bayu meugto?!”

Medyo mipakirut ya ing kulot uling matas ne boses ing lalaki, linawe ne at saka ne pikabitan – “Bakit koya? Meugto ta na wari?”

Mate keng mayli anyang kinuwento ne kekami ini.

Wapen naman, ela pa man meugto. Anya e ya mali ing amanuan na ning kapatad ta’ng kulot.

Eku balu nung ing kwento ayni, yapin ing penibatan ning amanuan dang kapanurong baluga (pasibayu pu, panupaya), pero andat makaramdam kung makibat na “karin” o “atyu ya ken” ampong “keta o“, agaganaka ke ing kwento ayni.

Sana aburi ye mu rin.

Kapilan mu ku paniwalan? E na ku man malaram
Gisan ku na ing nasi, meragul na ku atyan
Pati aslam yu, inaldok ku na ngan
Gewa ku na ing buri mu, e mu ku pa rin papansinan

Mayapa ing maestra tang English, keka yang paniwalaan
Adyang deng subject ampong predicate na, bali-baligtad no man
Pati maestro nang Science na e mu naman aintindiyan
Awsan neng gas ing krudo, saka na sabyan liquid ya naman

Ume da ka sanang atad, o kakung palsintan
Kapapakibat mu kaku balu mu ne man ing dalan
Mi-uli kang dili mu, e ra ka pigaganakan
Sinta ko, o’t lagi mu kung panyoplan?

Minsan lalapit ku pa, gilutan mu na ku
Saka ka milayi, anting menakit a multo
Ibie ku la sana, seli kung bulaklak para keka
Kabage da pa mo sana deting mabanglong Sampaguita

Angga pa kapilan mu ku kaya pasakitan?
At subukan me ing lugud kung alang kapupusan
Makanyan pa man, e mu ku pa rin apatuknan
Bukas a bukas mu rin, ding kekong abyas isundu kong bilangan

—————————————
Roy
June 24, 2008
11:05 AM
Angeles City
Philippines

Paunang amanu: Ing pung tutuking kwento, gawa ne mu pu ning metung a malikot a imahinasyon. Nanu man pung pami-kawangis na king tutung biye ding lagyu, lugar o kaganapan, e ku pu sasaryan ampong ala ku pung buring sabyan. Anyadwan ku pu ing kekayong pamanintindi. Salamat pu.

Malungkot ya i Rico kabang makalawe ya king malaut. Makalukluk ya karing metung a bench king park ning Tokyo, maygit neng pabanua atsu Japan, kailangan yang manipun ba na lang kasal ning tao na. Malapit ne pin muli, payari ne ing adwa nang banuang kontrata.

Dapot, king balitang tinggap na, e ne maybug muli. Tinuki ne kanu kareng aliwang lalake ing girlfriend nang i Gina ampong kinasal na la. Anya pin ngeni, atyu king park magmalun, isipan na o ba’t makanyan?

Nanu na ing sukat na’ng gawan?

Atyu ya king makanitang kondisyon anyang atin yang dimdam linukluk king siping na, anyang lawen ne ikit ne ing metung a babaeng tiktakan king lagu, makaba ya buak, morena ampong lupa yang Filipina.

Linawe niya naman ning babae, apansin ne mata i Rico na balamu ume yang kumiyak at nganang mengamanu “atin ka yatang problema, mangailangan kang kasabi?”

Misdan ya i Rico, e ya mu Filipina, Kapampangan ya pa! Makanita man, mekibat ya “Ing kasing girlfriend ku king Pilipinas, e ne mekapanenaya. Meki’sawa ne kanu, kelingwan na na ing pangako mi king metung at metung.”

“Makanyan?” ngana ning babae, at saka ne tilnan gamat i Rico,”kasakit na naman nita, e ka migaganaka atyu na ku man keni para ‘damayan’ da ka”

Atin kinislot king kilub ning pangatao nang Rico, bista man magdalamhati, minandar ya pa rin ing panga-playboy na. Lawen-lawen ne ing babae, kartada diyes ya talaga.

Oneng e pepahalata, at lalo neng papalungkutan ing lupa na, “talaga, dakal a salamat ne. Ako pala i Rico, nanung lagyu mu? Ampong o’t balu mung Kapampangan ku?”

“Ako i April, madalas ku kening park mamasyal. Akakit da na ka kanita pa, dimdam da na kang migsalita anya pin balu kung Kapampangan ka.”

Tangu-tango ya i Rico, malambat na ne palang lalawen April. Pihong atin ya kursunada kaya ini anya pin linapit ya kaya. E ne mig-aksaya pang oras i Rico.

“Sigurado ka, damayan mu ku king kalungkutan ko?” nganang Rico

“Wa naman, anya pin atyu ku” pakibat nang April.

“Angga mu ku nukarin damayan?” pamanyubok nang Rico kaya

“Angga nukarin mu buri!” pamanyigurado nang April, kabang makatiman yang malati at lalawen ne Rico.

Maligwang-maligwa inagkat neng Rico i April, sinake lang taksi at saka la minta ketang ‘marimlang lugar.’

E bubulad ing babae at tuki-tuki ya mu kang Rico kabang tatayran ne gamat palub king kwarto.

Anyang atyu na la king kilub, kitnangan ne pasibayung Rico, “angga keni damayan mu ko?” tinangu ya mu i April at saka ya maka-ayling tiktak king yumu.

E ne migpatumpik-tumpik i Rico, inuman ne April at minablas ne man ing babae. Malakwas na na pin man kelingwan Rico ing problema na, kayabe nang April pigsaluhan da ing amanuan dang ‘luto ning diyos.’

Mekapilan la pang ‘rounds‘ bayu la pa migpaynawa. Ne kasaya i Rico uling panamdam na meka-jackpot ya.

Kabang makapaynawa la sinabi ya i April, “balu mo? miglaram ku keka, malambat da na kang kakilala. Mikaklase kata anyang high school king holy. Kanita pa crush da na ka, oneng e mu ku papansinan. Anya pin n’yang ikit da ka kening Japan, menenaya kung chance para milapit keka. Angga ngeni kasi ya pa rin ing karisma mo kanaku e,” medyo kilig-kilig ya pang bagya.

“Talaga?!” nganang Rico at saka ya bural-bural a salo. “O’t e da ka atatandanan, nanung apelyido mu?”

“Cunanan” pakibat nang April.

Mimisip ya i Rico, “ala ku yatang atatandanan na April Cunanan kareng kaklase ku anyang high school, sigurado ka mikaklase kata?”

“Ay! Sori,” nganang April, “kamulalan ku naman! E ke kasi tutung lagyu ing April. Siyempre, balu mu naman deng entertainers keni Japan, mamalit kaming lagyu karas mi keni.”

“Aah! Okay, nanu pala ing tutu mung lagyu? Baka sakaling ita, atandanan ku ne” nganang Rico.

At pekibat nang April kaya, “Ing tutu kung lagyu…. Francis… Francis Cunanan.”

“Nah?!“