Siguro kaybat meng binasa ing pamagat na niti, ing mumuna mung sabyan, “O’t e ka sumulat?!”
O kaya, nung kakilala mu na ku, sabyan mu, “E wari mekasulat na kang libro?”
Tutu pu ita, kakaluwal na pa nitang libro kung REFLECTION anyang bulan ning Mayo, at maswelo ku pa pin uling anyang book launching ku mekatagun ya I Mayor Ed Pamintuan.
Ngeni naman, siguro sabyan mu, “O, nanung problema mu kanyan?”
Ita kasing REFLECTION, libro yang English poems. Ngeni, bisa na ku man sumulat a libro king kanakung Amanung Sisuan. Bisa kung sumulat a librong Kapampangan.
Nanung pipigil kanaku?
Nung ketang English a libro, malambat keng peka-isipan uling pota panisti da la reng English ku, mas higit pa ing takut ku karas keng amanung Kapampangan.
Dakal na ku dimdam, dakal na ku abalitan, ampo atin na ku rin ikit a mapilan… mas matalik la pung manisti detang amanuan dang “biyasa” king Kapampangan.
Pauli na pu nung akit yu naman ing kanakung Kapampangan, e naman makanita kalalam. Simple ampong mababo la mu. Manipis ya pa mu ing kanakung bokabularyo karas kareng salitang Kapampangan.
Ing kanaku naman pu kasing parasan ing makapag-pasyag, aliwa ing miparangalan. Sabi ku pin ketang kanakung metung a poesia, siguro naman mabiyasa ku rin keng kelambatan.
Ita pu ing maragul a bage anya mikakuno kung itaglus ke ing kanakung babalakan a librong Kapampangan.
Pero sabi da pin, istung ating manggatal e ne man mipasno angga’t e me gamusan. Lalu na pin uling atin kung buring ipasyag… anya pin bisa kung sumulat a librong Kapampangan.
