E mu minsan ing mikutang kanaku, “nanung obra mu?” O kaya, patse mikit kami reng kaluguran kung malambat ku nang e akakit, kutang da, “nokarin ka magobra ngeni?”
Istung makanita na, e ku balu nung nanung pakibat ku.
Atin kung obra, pero aliwa itang kalupa na ning “ordinaryong obra” antimo kareng aliwa. Ing obra ku kasi mag-blog ku, o susulat ku keng blog, o blogger e.
Keni kasi kekatamu, pipilan la mu talaga ring mikibalu nung nanu ya ing blogger, o deta namang mikibalu, e da aintindian o e la maniwalang pwede yang maging obra ing pamaging-blogger.
Anya neng kayi, pakibat ku na mu, ala kung obra, kesa king mag-explain ku pang katakut-takot. Uling medyo masakit ya kasing i-esplika at e ke agyung simplian.
Mapalyari karetang miki-balu, e la maniwalang pwede yang manakitan ing metung a blogger o pwede ya talagang maging kapanintunan. Kareng aliwa naman siguro, makaramdam kayo a asno katalik manakitan king internet.
Ing tutu, pwede yang panakitan, pero e ya karagulan kalupa da reng amanuan da reng aliwa a makasali na kang bale ampong kotse.
Ngeni, keng malati kung panakitan medyo agyu ku neng alabas ing patingapun mi. Mu pin, detang aliwa pang kailangan, kalupa da ring matrikula da ring anak, kailangan ku pang manintun aliwang pikuanan pera. E pa kasi kanita karagul ing akakua ku.
Maigit na ku pung pabanuang mag-blog, at ngeni ku pa magumpisang manakitan. Opo, e pu kararagli, miki-investment mu naman pu keng oras ampong atin talagang ‘effort.’ Kailangan ing metung a blogger masipag yang susulat, at e mu basta susulat nune reng susulat na retang makabuluhan o retang buring akit deng mamasa.
Siguro po, ali ke pa a-explain masalese keni. Mapalyaring keng tutuking pamanyulat ku keni, malyari kung idake nung makananung manakitan king blogging.
Ngeni, ita pa mu ing buri kung sabyan… karetang mangutang nung nanu ing obra ku… metung ku pung blogger.
Diyos ko, dumugo ang ilong ko. Balu ko po nung nanu ing blogger , Master Jedi Roy. Ila po itang gagawang blog- he he he..ampung online write-ups.
Tama na nga… ang galing Roy, kahit kapampangan. Mayap a bengi po!
Mayap a bengi!
maniwala kupu uling metung kurin kareng makinabang keng blogging. masakit pu talagang i explain. anam naku pung banwang mag obra keng call center bilang talasulat teknikal pero ala kung atipun. nyang migumpisa kung abalung pwedi kang manakitan keng blog keta ku mekatipun. dakal pung salamat keng post a ini. =)
babalakan kupung mag aral espanyol para atupad ko reng kakung pangarap at makasulat keng salitang espanyol. mengari pu na meg aral kung aleman at espanyol pero eku atuluy-tuluy uling keng sakit na ning bie. maging kong metung a inspirasyun kaku. dakal pung salamat.
aru! kabayat na ning buri mu abe! saludo ku keka!
e mu ne siguro disnan ing spanish king eskwela ne? anyang college kami, atin kami pang spanish, aru! maybug kung mibagsak rugu!
pero masanting ing balak mu, lupang atin na ka man disiplina king sarili, e malaut matupad ya yan
Koya Roy, malambat naku bisang mag-blog pero angga kumu keng umpisa. Makananu magumpisa at nanung subject ing dapat isulat? libu-lbo nala deng mag-blog atin la pang pagasa deng bayung magblog? maliari mukung dinan tips. Sobra ku apreciate nung asupan muku. mayap a aldo and God Bless.
Pasensya na ko pu, e ku agad mekapakibat. Mumuna pung dili, maligwa mu naman gawang blog – ke english ya man, tagalog o kapampangang pa.
Keta pung nung nanung isulat, nung nanung hilig yu, ita pung buri yung isulat. Ing blog kasi metung ya namang paralan ning pami-pasyag ning sarili (self-expression), anya pin ala pung malyaring magdikta nung nanung malyari ampong e malyaring isulat. Basta observe ta la mu po retang ‘basic courtesy’ ana pin, alang kapanyiran kareng aliwang tau.
Keta naman pung masyado na lang marakal deng blogs, tutu pu ita… at darakal la pa. Pero e na pu kalupa ning komersiyo a potang marakal, masakit nang lungub. Ing blog pu, alang kapupusan (para kanaku), anya andat ating bisang mag-blog, laging maliwalas para karela.
Keta naman pung pamag-umpisa, depende pu kasi nung nanung parasan yu – manakitan, o bisa kayu mu pong manapse amanu. Malyari kayu pong mag-umpisa karetang free-hosted blog platform kalupa na pu ning blogger.com ampong wordpress.com. Maligwa mu pu, patse mig-sign up kayu karen, ing kailangan mu, atin kayung e-mail.
Ita na pa mu pu, bang e kayo masyado mabibigla.
Dakal pung salamat keng tiwala.