Kabang ala ku pa pung asusulat keni, pabusten yu pung idake ke pasibayu ing kanakung mumunang tula, o poesiang Kapampangan a kanakung asulat.
Ing kanakung pangamulat:
Kalambat Ku Palang Mulala!
Kalambat ku palang mulala, antimong tupang mawawala
Pilit keng kakaulan, ing dila da reng banyaga
Kanta, tula ampong sanese, keng english ko tatalete
Na ku pa mo kapagmaragul, ing batal ku e me abakle
Minsan a aldo, anti ku mong mitakid… misubub
Bala mo migising king malambat a pangatudtud
Kantang Kapampangan, kakung apakiramdaman
Poesia ampong sanese, mekapamasa ku naman
Kasanting da palang babasan, kanyaman dang pakiramdaman
Anti mong pamangan a tiktak yumu, pero e makasabal man
Ing Amanung Sisuan, tutu yang makagiyam
Mengari ka mong bingut, yuyuyu ra king duyan
Anya pin inisip kung subukan, ta’t mo ali?
Kapampangan ku pa rin, yan ing mumunang dili!
Ing Amanung Sisuan, kanaku yang gamitan,
Kareng kakung susulat, ipasyag k’ya naman
Dapot minisip ku’t mikakunu naman
Pota mipakarine ku, maging pikatulan
Lunto kung magsasa, trying hard ing datang
Uling ing Kapampangan ku, medyo mababo la naman
Mikakunu ku man, masikan na ku pa rin agutan
Mengari mong ket lamok, ne nyaman gamusan
Ipasyag ku ing kanaku, adyang mababo Kapampangan
Siguro keng kelambatan, mabyasa ku naman
Ngeni e na ku mulala, e na ku malilili
Keng sariling bale, antimong mekauli
Ing sarili kung salita, kanaku neng gagamitan
Yapin ing Kapampangan, ing Amanu kung sisuan
——————————
Roy
June 24, 2008
9:00 AM
Angeles City
Philippines
Dakal a salamat keng pamanyulat mo. Kasanting na talaga ning Kapampangan. Mebigla ku pero mesaya na atin palang Kapampangan Blog. Mayap a oras.
Dakal pung salamat Miss Corrie at aburi ye ing kanakung blog a Kapampangan. Sana pu mibalik kayong pasibayu.
Marakal la pa pu reng susulat ampong magpalawak king kekatamung Amanung Sisuan, istu pung alugaran ku la, ipaskel ku la keni deng site da.
Dakal pung salamat pasibayu ampong mayap a aldo pu!
[...] ku na pin mengamanu ketang metung kung kawatasan “Kalambat ku palang mulala!“ Pero ngeni, mimulat na ku king [...]
Dakal a salamat king quekang pamanggising kanaku… Nung equekang pamangiyam, ekunaman migising…. Pasibayu, dakal a dakal a salamat….
dakal mu naman pung salamat king oras a binye yu para basan ing kanakung poesia
.-= Roy´s last blog ..Fiestang Kuliat 2010 – Schedule of events =-.