Dakal pung salamat king pamagpasyal yu!
Malaus ko pu kening kanakung bayung bale!
Nung ibat kayo ketang dati kung bale a nung nukarin susubuk ku pa mu, ngeni adya pung bagya, medyo mika-kumpyansa na ku.
Adyang pang ing kanakung Kapampangan simple ya mu ampo ali ne man anti kanita kalalam, maragul ku pa mu rin kapasalamatan at ating mekatanggap ampong meka-’appreciate’ ketang kanakung malating ambag.
Ngeni, kening kanakung bayung bale, e na ku ‘maki-tuknang‘ o under keng ‘free-hosting.’ Self-hosted ne pu ining kanakung bayung bale, at ita mu pu ing talagang maragul a mibayu.
Ing estilo, parasan ampong kapagnasan… ‘ya pa mu rin pu.
Mumunang dili, king pansarili – ing palawakan pa ing kanakung kebaluan king Amanung Sisuan; at king kerakalan naman – ing idake ke, nanu mang ditak a kebaluan a malyari kung idake, ba’ng tuluy-tuloy ing pamaglabong na ning kekatamung sariling amanu.
E ku naman pu lilingad, a dakal kung blog a mi-apse king amanung banyaga, ya’pin pin ing English. Pero e na man pu buring sabyan a mas kaluguran ke ing dilang banyaga, nune mamabut ku mu pu kareng kerakalan a gagamit king Internet, at e la pu magsalitang Kapampangan.
Anya pin naman pu, makanyan kung a-isipan a gawa ku pang metung pang blog para kareng Kapampangan, a nung nukarin ing amanung gagamitan ya’pin ing amanung sisuan.
Deta pung atyu king dati kung, siguro pu paditak-ditak, ipaskil ku la naman keni. Pero dakal ku naman pu isulat a bayu keni – poesia, dalit, bali-balita o kapalyarian king kanakung balen a Angeles, o mapalyaring king aliwa na pang parti ning Pampanga.
At siyempre, pa ipasyag ku mu naman pu ing kanakung opinyon, reaksyon, suhestiyon o kapanamdaman kareng aliwang maliliyari – king sarili kung biye, king balen, king lalawigan, king bansa o king mabilug a yatu man.
Anya pin ngeni, agkatan da kayo, antimo pu nung makananu yu kung tinggap ketang dati kung bale a nung nukarin susubok ku pa, sana pu tanggapan yu ku naman ampong suportan kening kanakung bayung bale.
Keni pu, malaus ko pu!
